Búgin Úkimet otyrysynda Ulttyq ekonomika ministri Áset Erǵaliev «Qýatty óńirler – el damýynyń draiveri» ulttyq jobasy qandai nátije beretinin aitty, dep habarlaidy QazAqparat.
«Qýatty óńirler – el damýynyń draiveri» ulttyq jobasy bazalyq qyzmetterge teń qoljetimdilikti jáne elimizdiń kóliktik bailanysyn qamtamasyz etýge baǵyttalǵan. Bul óńirler arasyndaǵy qatynasty jáne óńirler ishindegi eldi mekenderdiń bir-birimen bailanysyn qamtamasyz etedi.
Osy baǵyttardy iske asyrý aiasynda 4 mindet, 20 kórsetkish jáne 94 is-shara kózdelgen. Ulttyq jobany qarjylandyrýdyń jalpy kólemi shamamen 7,6 trln teńge, onyń ishinde respýblikalyq biýdjette 4 trln teńgeden astam, al jergilikti biýdjetterde 786 mlrd teńge qarajat qarastyrylǵan. Bul qarajat shamamen 2,8 trln teńge jeke investitsiialar tartýǵa múmkindik beredi», - dedi Á. Erǵaliev.
«Qýatty óńirler – el damýynyń draiveri» ulttyq jobasynyń negizgi sharalarynda 13,5 trln teńge turǵyn úi qurylysyna investitsiia tartylady, 16 myń shaqyrym sýmen jabdyqtaý jáne sý burý jelileri salynady. Ekinshi joldardy salý jáne «Dostyq-Moiynty» ýchaskesin elektrlendirý esebinen «Qytai-Eýropa-Qytai» qatynasynyń ótkizý qabiletin 5 esege ulǵaitý josparlanýda. «Túrkistan-Shymkent-Tashkent» joǵary jyldamdyqty magistraliniń qurylysy qamtamasyz etiledi.
Ulttyq jobany iske asyrý qorytyndylary boiynsha mynadai kórsetkishterine qol jetkiziletin bolady:
- Qalalar men aýyldarda sýmen jabdyqtaý jáne sý burý qyzmetterine 100% qoljetimdilik qamtamasyz etiledi.
- 2025 jyldyń sońyna deiin damý áleýeti bar 3561 aýyldy jańǵyrtý josparlanýda.
- 103 mln sharshy metr turǵyn úi paidalanýǵa beriletin bolady.
- Respýblikalyq avtojoldardyń barlyǵy jáne jergilikti deńgeidegi avtojoldardyń 95% jaqsy jaǵdaiǵa jetkizý kózdelip otyr.
- Avtomobil joldarynyń sapasyn arttyrý tranzittik júk aǵyny kólemin 2025 jylǵa qarai 30 million tonnaǵa deiin ulǵaitýǵa múmkindik beredi.
«Jalpy, joǵaryda atalǵan úsh Ulttyq jobany tiimdi iske asyrý turaqty ekonomikalyq ósýdi 5% joǵary deńgeide qamtamasyz etýge, halyqtyń tabysyn 27% arttyrýǵa jáne 450 myń turaqty jumys ornyn qurýǵa múmkindik beredi.
Sonymen qatar, Dúniejúzilik ekonomikalyq forýmnyń básekege qabilettilik reitinginde infraqurylym sapasy boiynsha Qazaqstannyń pozitsiiasyn qyrqynshy orynǵa deiin jaqsartý kózdelýde», - dedi ministr.
Budan buryn habarlanǵandai, ministr Úkimette úsh ulttyq jobany tanystyrdy.
Qazaqstan Respýblikasy Prezidenti janyndaǵy Reformalar jónindegi joǵary keńestiń tapsyrmasyn oryndaý maqsatynda, Ulttyq ekonomika ministrligi múddeli memlekettik organdarmen birlesip úsh Ulttyq jobany ázirledi. Olar «Qazaqstandyqtardyń ál-aýqatyn arttyrýǵa baǵyttalǵan turaqty ekonomikalyq ósý» jáne «Kásipkerlikti damytý», sonymen birge «Qýatty óńirler – el damýynyń draiveri» atty ulttyq jobalar.
