Oral men qala mańyndaǵy eldi meken turǵyndary masa men shirkeidiń kóptigine shaǵymdanady. Adamdar keshke dalaǵa shyǵý múmkin emes ekenin aitty. Sonymen qatar, Energetika jáne turǵyn úi-kommýnaldyq sharýashylyq basqarmasy aýmaqty masa men shirkeige qarsy óńdeýge 93 million teńgeden asa qarajat bólingenin málimdedi, - dep habarlaidy Tengrinews.kz.
Oral turǵyndary jazdyń aptap ystyǵynda dalaǵa shyǵý múmkin emes ekenin, al kún salqyndaityn keshki ýaqytta "qansorǵyshtar" mazalaitynyn aitty.
"Biz Jaiyq ózeni mańynda turamyz. Keshke qyzymyzdy alyp serýendeýge shyǵamyz. Alaida kóshede júrý múmkin emes. Aiaq-qoldyń bárin shaǵyp tastaidy. Oǵan bólingen milliondaǵan qarjy qaida ketti?", - dedi qala turǵyny Tatiana Simonova.
Áleýmettik jelilerde de turǵyndar shaǵymy paida boldy.
Energetika jáne TKSh basqarmasy málimeti boiynsha, Oral aýmaǵy men oǵan jaqyn mańdaǵy aýyldardy dezinsektsiialaýǵa 93 million teńge bólingen.
"Jumysty "Magtoksin" JShS júrgizedi. Birinshi kezeńde 2 myń gektar jer óńdeldi. Bul ózen ańǵary, toǵandar, sý shalǵyndary. Endi óńdeýdiń ekinshi kezeńi bastaldy. 13 myń gektardy óńdeý josparlanǵan", - dedi BQO energetika jáne TKSh basqarmasy bóliminiń bas mamany Aian Hamidýllin.
Qala ishinde óńdeý jumystary júrgizilmeidi. Bul tehnikalyq múmkindikke bailanysty, deidi basqarma ókilderi.
"Kún kúrt jylýyna bailanysty keibir sý qoimalaryn óńdeýge ýaqyt bolmady. Qazir biz aýmaqtardy keshke jáne tańǵa deiin óńdeimiz. Biraq barlyq jerdi emes. Sebebi adamdar sportpen shuǵyldanyp, balalar oinap júredi", - dedi merdiger uiymnyń dezinsektory Albina Dúisenbaeva.
Sarapshylar maýsymǵa deiin masa men shirkeige qatysty jaǵdaiy turaqtalatynyn aitty.
