QR Ishki ister ministriniń orynbasary Iýrii Ilin eldegi dala órti jóninde pikir bildirdi, dep habarlaidy QazAqparat.
«Dala órti boiynsha Qaraǵandy oblysyndaǵy ahýal qiyn - mundaǵy jalpy órt kólemi 2,7 myń gektarǵa jetti. Ony sóndirýge Orman sharýashylyǵy komiteti, jergilikti atqarý organdarynyń jáne QR IIM bólimsheleri jumysqa tartyldy. Órtti oqshaýlap, sóndirý úshin qosymsha tikushaqtar berdik», - dedi Iýrii Ilin Ministrlikter úiinde ótken baspasóz máslihatynda.
Onyń aitýynsha, aptap ystyq aýa raiy órttiń qaita tutanýyna yqpal etip otyr.
«Almaty oblysyndaǵy Panfilov aýdanyndaǵy, Almaty qalasyna jaqyn ornalasqan Talǵar, Qaskeleń aýdandaryndaǵy órt tolyq sóndirildi. Biraq, ystyq aýa raiyna bailanysty Almaty, Qaraǵandy, Qostanai, Aqmola oblystarynda órt qaýpi joǵary bolyp qala beredi», - dedi spiker.
Sinoptikterdiń boljaýynsha, jaqyn kúnderi Qazaqstanda aýa raiy ózgerip, jańbyr jaýýy múmkin. Bul dala órtin sóndirýge áser etedi.
«Boljam boiynsha, Almatyǵa jaqyn óńirler men Nur-Sultannyń ainalasynda jańbyr jaýýy múmkin. Bul órt qaýpin aitarlyqtai tómendetedi», - dedi Iu. Ilin.
Aita keteiik, ystyq aýa raiynan Jambyl, Aqmola, Qaraǵandy oblystary men Almaty qalasyndaǵy Kóktóbede órt shyqty. Sondai-aq Qarqaralydaǵy órt 1,5 myń gektar ormandy sharpydy
