QR Tuńǵysh Prezidenti Nursultan Nazarbaev Resei men Ýkraina arasyndaǵy qaqtyǵysqa qatysty pikir bildirdi, dep habarlaidy QazAqparat.
«Resei men Ýkrainanyń arasyndaǵy jaǵdai, árine, qynjyltady. Olar bir-birine óte jaqyn elder. Alaida bolary boldy. Ishki jáne syrtqy kúshter aralasyp ketti. Qazir qarym-qatynastyń ajyrap ketkeni sonshalyq... Ýkraina men Reseidi óte jaqsy bilemin. Alǵashqy kúnderden bastap-aq eki eldi tatýlastyrýǵa tyrysyp kelemin. Meniń jumysymnyń nátijesi – Minsktegi alǵashqy kezdesý boldy. Basynda men eýropalyq elderdi aralap, Merkel hanymmen kezdestim. Keiin Kievke kelip, Poroshenkomen kezdestim. Odan keiin Máskeýge bardym. Frantsiia prezidenti Qazaqstanda bolǵan kezde jol ortada Pýtinmen kezdesýdi ótindim. Osynyń nátijesinde biz Minskte bas qosyp, máselelerdi sheshýge tyrystyq», - dedi Nursultan Nazarbaev Astana Club otyrysynda.
Elbasynyń aitýyna qaraǵanda, bári oidaǵydai kele jatqan.
«Máskeýdiń talaby men ótinishi – Ýkrainanyń shyǵysyndaǵy azamattardy qorǵaý týraly zań qabyldaý edi. Ol azamattar – sondaǵy protseske qatysqandar, sottalǵandar, taǵy basqa... Ýkraina Radasy mundai zańdy qabyldaǵanymen, ol oryndalmai jata berdi. Zań osy jyldyń 31 jeltoqsanynda kúshin joiady», - dedi ol.
Nursultan Nazarbaev Ýkrainanyń qazirgi prezidenti Vladimir Zelenskiimen kezdeskenin aityp ótti.
«Keshe Vladimir Pýtinmen bul máseleni ary qarai qalai sheshýge bolatyny týraly tildestim. Qarym-qatynastyń ýshyqqany sonshalyq, Ýkraina Batys pen AQSh-qa appeliatsiiamen shyǵyp otyr. Meniń oiymsha, Resei men Ýkrainanyń prezidentterin jeke kezdestirý kerek. Tek osylai ǵana kelisýge bolady. Sebebi, eki el arasyndaǵy naqty jaǵdai sheshiledi. Men osyndai kezdesý múmkin dep oilaimyn. Menińshe, qazir osy kezdesýdiń dál sáti týyp tur. Birinshiden, Zelenskii sailaýda halyqtyń qoldaýyna ie boldy. Dýma da jańa prezidentti qoldaityn azamattardy sailady. Ol osy máseleni sheshe alady. Qos tarap kelisse, bul máseleni alǵa jyljytý kerek», - dedi Elbasy.
Nursultan Nazarbaevtyń aitýynsha, qazir áskerler bir-birinen alystap jatyr.
«Iaǵni, máseleniń sheshimi bar. Alǵa jyljý kerek. Resei men Ýkraina prezidentteri jiger tanyta bilýi tiis. Bul baǵytta jumys júrgizip jatyrmyn. Barshańyzdy Resei men Ýkrainanyń arasyndaǵy qatynasty buzbai, kerisinshe jaqyndastyrýdy usynamyn. Donbas pen Lýgansktegi máseleni sheshý kerek. Protsess júrip jatyr. Tutqyndaǵy azamattar bosap, ásker bir-birinen alystai bastady. Sondyqtan, osyndaǵy sarapshylar da ondaǵy beibitshilikti saqtaý baǵytynda oi aitýy tiis», - dedi ol.
Tuńǵysh Prezident Resei men Ýkraina prezidentteriniń kezdesýi úshin neitraldy aimaq retinde Qazaqstandy usyndy.
Eske sala keteiik, keshe QR Tuńǵysh Prezidenti Nursultan Nazarbaev Resei Federatsiiasynyń Prezidenti Vladimir Pýtinmen telefon arqyly sóilesken edi. Al Japoniiaǵa sapary kezinde Elbasy Ýkraina Prezidenti Vladimir Zelenskiimen kezdesken.
