Ulybritaniia men Irlandiiada Covid-19 órship tur. Italiiada kún saiyn kovid-sertifikat engizýge qarsylyq tanytýshylar sherýge shyǵyp jatyr, al Rýmyniiadaǵy aýrýhanalar COVID-19 aýyr túrine shaldyqqan naýqastarǵa tolyp tur. Bul týraly QazAqparat Euronews-ke silteme jasap habarlaidy.
Ulybritaniiada Covid-19 órship ketti. Sońǵy aptada kórsetkish 16%-ǵa ósken. Sarapshylar bul jaǵdaidy koronavirýs jańa shtamynyń taralýymen bailanystyrdy. AY.4.2 túri shilde aiynda anyqtaldy, al qazir infektsiiamen túsken barlyq naýqastyń 6%-y osy shtamǵa tiesili. Bir táýlik ishinde 223 naýqas qaitys boldy, bul naýryz aiynan beri tirkelgen joǵarǵy kórsetkish.
Sonymen birge, Ulybritaniia biligi jańa sanitarlyq shekteý engizýdi áli josparlap otyrǵan joq.
Italiiada kún saiyn kovid sertifikattardy engizýge qarsylyq tanytýshylar sherýi ótip jatyr. Triesta portynda politsiia eldiń túkpir-túkpirinen kelgen narazylyq bildirýshilerdi taratý úshin sý shashatyn qurylǵy qoldandy. Aktsiiaǵa qatysýshylar tórt kún boiy port qaqpasyn jaýyp tastady.
Irlandiiada uzaq ýaqyt shekteýlerden keiin túngi klýbtar ashyla bastady, biraq el biligi aýrýhanalardyń lyq tolýy men aýrýǵa shaldyqqandar sanynyń ósýine bailanysty kóptegen sanitarlyq sharalardy alyp tastaý josparyn qaita qarady.
Rýmyniia aýrýhanalarynda COVID-19 aýyr túrine shaldyqqan naýqastarǵa oryn jetispei jatyr. Bilik mobildi gospitalder uiymdastyryp jatyr, biraq olar da naýqastardy qabyldap úlgermei jatyr, dep jazady Euronews .
Elde 1 750 adam jansaqtaý bóliminde jatyr. Keibir naýqastar birneshe kún boiy jedel járdem kóliginde ókpeni jasandy jeldetý apparatyna qosylǵan. Keibireýleri aýrýhanaǵa kirmesten qaitys bolýda. Onyń sebebi - vaktsinatsiianyń tómendigi. Rýmyniia Eýroodaqtaǵy vaktsina alý qarqyny eń tómen memleket. 19 millionnan astam halqy bar elde turǵyndardyń 35,2%-y ekpeniń kem degende bir dozasyn alǵan, 29,4%-y tolyǵymen egilgen.
