Senbi, 10 sáýirde Qazaqstanda 2842 adamnyń analizinen koronavirýs infektsiiasy anyqtaldy. Bul – buryn-sońdy bolmaǵan kórsetkish. Respýblika boiynsha tirkelgen naýqastardyń myńnan astamy Almaty qalasy men oblysynyń úlesinde.
Koronavirýs naýqastarynyń jalpy sany jóninen birinshi orynda turǵan Almatyda bir kúnde 709 naýqas tirkelgen. Qalada 9 sáýirde 715, 8 sáýirde 717 naýqas anyqtalǵan edi. Qalany qorshai ornalasqan Almaty oblysynda – 355 naýqas. Ekeýin qosqanda Covid infektsiiasy bir ǵana kúnniń ishinde 1064 adamnan anyqtalǵan bolady. Bul – respýblika kórsetkishiniń 37,4 paiyzy.
Ekinshi orynda turǵan Nur-Sultanda Covid juqtyrǵany rastalǵandar qataryna 591 adam qosylǵan. Bul – indet bastalǵaly eń joǵarǵy kórsetkish. Osyǵan deiingi rekord 7 sáýirde ornaǵan. Ol kúni 578 naýqas shyqqan. Aqmola oblysynda koronavirýs 103 adamnyń analizinen anyqtaldy.
Budan bólek, Qaraǵandy oblysynda 210, Aqtóbe oblysynda 202 naýqas, Atyraý oblysynda 131, Batys Qazaqstan oblysynda 127 naýqas tirkelip otyr. Qalǵan aimaqtarda bir kúnde anyqtalǵan naýqas sany júzge jetpeidi. Eń tómengi kórsetkish – Túrkistan oblysynda. Onda táýlik ishinde 24 adamnyń PTR testi oń shyqqan.
Bir kúnde koronavirýs juqtyrǵany rastalǵandar arasynda 1222 adam jazylyp shyqqan.
Elde indet bastalǵaly barlyǵy 269 519 adamnan koronavirýs infektsiiasy anyqtalǵan. Onyń 234 myńy jazylyp shyqqan, 3221-i qaitys bolǵan. Bul statistikaǵa koronavirýs juqtyrǵany rastalǵan, biraq "ózge aýrýdan qaitys boldy" degen adamdar kirmeidi.
11 sáýirdegi derekterge sáikes, koronovirýstan 32 899 adam (32 241 KVI+ jáne 658 KVI-) emdelip jatyr. Olardyń ishinde 12 003 patsient statsionarda, 20 896 naýqas ambýlatoriialyq deńgeide em qabyldaýda.
KVI+, KVI- shaldyqqandardyń arasynda:
- 546 adamnyń jaǵdaiy aýyr;
- 163 patsienttiń jaǵdaiy óte aýyr;
- 99 naýqas ókpeni jasandy jeldetý apparatyna qosylǵan.
1 sáýir kúni Qazaq Times basylymy osy mekemege siltei otyryp, 2020 jylǵy 1 naýryzdan bastap 2021 jylǵy 29 naýryzǵa deiin koronavirýs juqtyrǵany anyqtalǵan 1619 adamnyń "ózge aýrýdan qaitys bolǵanyn" habarlady.
Qazaqstan úkimeti byltyr tamyzdan beri virýs juqtyrǵany PTR testimen rastalmaǵan, biraq aýrý belgileri boiynsha koronavirýsqa uqsaityn pnevmoniia esebin júrgizip keledi. Sodan beri elde barlyǵy 51 362 adam pnevmoniianyń osy túrimen tirkelgen. Onyń 727-si qaitys bolǵan. Bul derek koronavirýstyń resmi statistikasynan bólek júrgiziledi.
11 sáýirdegi málimet boiynsha, elde 313 611 adam "Spýtnik V" ekpesiniń birinshi dozasyn alsa, 104 889 azamat eki dozasyn da alǵan. Koronavirýsqa qarsy ózge vaktsinalar sekildi "Spýtnik V" ekpesi de eki dozadan turady. Ekinshisi birinshisinen keiin 21 kún ótkende salynady.
