15 shildede Qazaqstanda taǵy 5648 adamǵa koronavirýs juqqany belgili boldy. Bul – koronavirýs kórsetkishi boiynsha jańa rekord. Bir kún buryn koronavirýs juqtyrǵandar taǵy kóbeiip, indet bastalǵaly beri alǵash ret 5 myńnan asqan.
Eki kún burynǵy aqparat boiynsha, PTR testi teris shyqqan 122 adamǵa koronavirýs pnevmoniiasy diagnozy qoiylǵan. Densaýlyq saqtaý ministrligi koronavirýs pnevmoniiasy boiynsha eki kún burynǵy aqparatty jariialaidy.
Qazir Qazaqstanda virýs kúsheigen. Úsh iri qala men 10 oblys koronavirýs boiynsha "qyzyl aimaqta" tur: Nur-Sultan, Almaty, Shymkent qalalary, Pavlodar, Atyraý, Qaraǵandy, Aqmola, Qostanai, Aqtóbe, Mańǵystaý, Batys Qazaqstan, Soltústik Qazaqstan, Qyzylorda oblystary. Algoritmge sáikes, "qyzyl aimaqtarda" karantin kúsheiedi. "Sary men jasyl aimaqta" sanaýly oblystar qaldy. "Sary aimaqta" Almaty oblysy men Jambyl qalǵan. Túrkistan men Shyǵys Qazaqstan oblystary "jasyl aimaqta".
Bilik organdary indettiń órshýin koronavirýstyń "delta variantymen" bailanystyrady. Úndistanda anyqtalǵan bul variant Qazaqstanda alǵash ret maýsymnyń sońynda tirkelgen. Jańa variant alǵashqy variantqa qaraǵanda edáýir juqpaly.
Resmi málimet boiynsha, 14 shildede Covid-pen bailanysty 54 adam ólimi tirkelgen: 48 adam – koronavirýstan, 6 adam koronavirýs pnevmoniiasynan qaitys boldy dep aitylady.
Qazaqstanda 2020 jyldyń naýryz aiynan beri 477 754 adamnyń koronavirýs testi oń shyqqan. 4864-i qaitys bolǵan. Buǵan koronavirýs juqtyryp qaitys bolǵan 2300-den astam adamnyń ólimi kirmei qalǵan. Densaýlyq saqtaý ministrliginiń túsindirýinshe, olar "ózge aýrýdan qaitys bolǵan". Biraq DDSU nusqaýlyǵynda oqys jaǵdaidan ózgeniń bárin koronavirýs ólimi statistikasyna qosý qajet dep jazylǵan.
Úkimet byltyr tamyzdan beri koronavirýsqa uqsaityn pnevmoniia esebin júrgizip keledi. 14 shildege deiin 58 335 adam pnevmoniianyń osy túrine shaldyqqan. 3520-y qaitys bolǵan. Bilik bul derekti koronavirýstyń negizgi statistikasyna qospai otyr.
16 shildedegi málimet boiynsha 50 457 adam koronavirýs infektsiiasynan (48 894 KVI+ jáne 1 563 KVI-) emdelip jatyr.
Onyń ishinde:
🔸 16 186 patsient statsionarda
🔸 34 271 naýqas ambýlatoriialyq deńgeide em qabyldaýda.
KVI+, KVI- shaldyqqandar arasynda:
🔹 934 adamnyń jaǵdaiy aýyr
🔹 225 patsienttiń jaǵdaiy óte aýyr
🔹 117 naýqas ÓJJ apparatynda jatyr.
Elde aqpan aiynan beri halyqqa koronavirýsqa qarsy vaktsina salyna bastady. Sodan beri 4 mln 776 myń adam vaktsinanyń keminde bir dozasyn alǵan. 2 mln 661 myń adam vaktsinanyń eki dozasyn alǵan. Beisenbi kúni Qazaqstanda reseilik ekinshi vaktsina "Spýtnik laittyń" ýaqytsha tirkelgeni habarlandy.
Djons Hopkins ýniversitetiniń málimetinshe, álemde indet bastalǵaly beri 188 mln 868 myń adam koronavirýsqa shaldyqqan. 4 mln 65 myńy qaitys bolǵan.
Dúniejúzilik densaýlyq saqtaý uiymy osy aptada álemde koronavirýs indetiniń úshinshi tolqyny bastalǵanyn málimdep, memleketterdi vaktsinalaý naýqanyn jyldamdatýǵa shaqyrǵan.
