29 shildede Qazaqstanda koronavirýs boiynsha taǵy da rekordtyq kórsetkish tirkeldi: 7778 adamnyń koronavirýs testi oń kórsetti. Indet bastalǵaly beri bir kúnde osynsha kóp naýqas anyqtalmaǵan. Odan bólek, taǵy 304 adam pnevmoniianyń koronavirýsqa uqsas túrine shaldyqqan.
Elde virýs órshidi. Densaýlyq saqtaý ministrliginiń aitýynsha, maýsym aiymen salystyrǵanda qazir aýrý ósimi 5,2 paiyzǵa artqan. Ásirese Nur-Sultan, Almaty qalasy jáne Qaraǵandy oblysynda kún saiyn buryn-sońdy bolmaǵan kórsetkishter tirkelip jatyr.
Beisenbi kúni Nur-Sultanda – 1555, Almaty qalasynda – 1680, Qaraǵandy oblysynda 931 adamnan koronavirýs anyqtaldy. Shymkent pen Atyraý oblysynda bir táýlikte 400-den astam naýqas tabylǵan. Qalǵan oblystar men qalalarda ortasha eseppen 150-300 tóńireginde naýqas anyqtalyp júr. Qazir "sary aimaqta" Túrkistan oblysy ǵana qaldy.
Bir kún buryn bas sanitar dáriger virýs qatty kúsheigen aimaqty "qanyq qyzylmen" belgileý jóninde qaýly shyǵarǵan.
Elde koronavirýspen bailanysty adam ólimi kórsetkishi joǵary. 28 shildede 101 adam qaitys bolǵan: 80 adam – koronavirýstan, 21 adam koronavirýs pnevmoniiasynan kóz jumǵan dep aitylady.
Bilik indettiń órshýin delta varianttyń taraýymen bailanystyrady. "Delta" koronavirýstyń kádimgi túrine qaraǵanda jyldam juǵady jáne asqynýy da tez. Resmi málimet boiynsha, Qazaqstanda delta maýsym aiynda tirkelgen.
30 shildedegi málimet boiynsha, 93 580 adam koronavirýs infektsiiasynan (–91 133 + jáne 2 447 KVI-) emdelýde. Olardyń ishinde 26 408 patsient statsionarda, 67 172 naýqas ambýlatoriialyq deńgeide em qabyldap jatyr.
KVI+, KVI- shaldyqqandardyń arasynda:
1 639 adamnyń jaǵdaiy aýyr;
345 patsienttiń jaǵdaiy óte aýyr;
180 naýqas ókpeni jasandy jeldetý apparatyna qosylǵan.
28 shilde kúngi málimet boiynsha, elde aýrýhanalardyń 53 paiyzy, reanimatsiialardyń 43 paiyzy bos emes. Bilik aýrýhanadaǵy oryn tapshylyǵy týraly aita bastady.
Indet bastalǵaly beri 564 myńnan astam adamnyń koronavirýs testi oń shyqqan. Budan bólek, PTR testi teris nátije kórsetip, biraq aýrý belgileri koronavirýstykine uqsaityn pnevmoniia esebi bar. Úkimet bul esepti byltyr 1 tamyzda bastaǵan. Sodan beri pnevmoniianyń bul túrine 60 myńnan astam adam shaldyqqan.
2020 jyldyń naýryz aiynan beri 5780 adam koronavirýstan qaitys boldy dep aitylady. Tamyz aiynan beri koronavirýs pnevmoniiasy 3697 adamnyń ólimine sebep bolǵan.
Kei sarapshylar koronavirýs boiynsha resmi málimet tym tómendetilgen, shyn máninde virýs juqtyrǵandar men odan qaitys bolǵandar áldeqaida kóp dep sanaidy.
Qazaqstanda aqpan aiynan beri halyqqa koronavirýsqa qarsy vaktsina salynyp jatyr. Sodan beri 5,3 million asa adam vaktsinanyń birinshi dozasyn alǵan. Ekpeniń tolyq dozasyn alǵandar 3,6 millionnan asty.
