Qazaqstanda koronavirýs juqtyrǵandar kóbeiip jatyr. Virýs juqtyrǵandar ekinshi kún qatarynan 8 myń adamǵa kóbeigen. Bul týraly senbi, 31 shilde kúni densaýlyq saqtaý ministrligi habarlady.
Eki kún burynǵy (29 shilde) aqparat boiynsha, Qazaqstanda koronavirýs juqtyrǵan taǵy 7691 adam anyqtalǵan. 86 naýqas qaitys bolǵan.
PTR testi teris shyqqan 309 adamǵa koronavirýs pnevmoniiasy diagnozy qoiylǵan. 14 adam osy dertten kóz jumǵan.
Qazir Qazaqstanda virýs órship tur. Densaýlyq saqtaý ministrliginiń aitýynsha, ótken aimen salystyrǵanda shildede aýrý ósimi 5 paiyzdan artyq ósken. Almaty, Nur-Sultan, Shymkent qalasy men Aqmola, Aqtóbe, Almaty, Atyraý, Batys Qazaqstan, Jambyl, Qaraǵandy, Qostanai, Qyzylorda, Mańǵystaý, Shyǵys Qazaqstan jáne Soltústik Qazaqstan oblystary - "qyzyl aimaqta", Túrkistan oblysy - "sary aimaqta". Beisenbi kúni Qazaqstan bas sanitar dárigeri virýs qatty órshigen aimaqty "kúreń qyzylmen" belgileý jóninde qaýly shyǵarǵan.
Úkimet indettiń órshýin koronavirýstyń asa juqpaly ári qaýipti "Delta" variantymen bailanystyrady. Eń alǵash ret Úndistanda anyqtalǵan bul variant Qazaqstanda maýsymnyń aiaǵynda tirkelgen.
31 shildedegi málimet boiynsha, elde 95 998 adam koronavirýs infektsiiasynan (–93 366 + jáne 2 632 KVI-) emdelip jatyr.
Emdelip jatqandardyń ishinde 27 004 patsient statsionarda, 68 994 naýqas ambýlatoriialyq deńgeide em qabyldaýda.
KVI+, KVI- shaldyqqandardyń arasynda:
• 1 677 adamnyń jaǵdaiy aýyr,
• 349 patsienttiń jaǵdaiy óte aýyr,
• 334 naýqas jasandy tynys alý apparatynda jatyr
Álemde pandemiia bastalǵaly beri Qazaqstanda 572 myńnan astam adamnyń koronavirýs testi oń (KVI+) shyqqan. Buǵan qosa PTR testi teris (KVI-) nátije kórsetip, biraq aýrý belgisi koronavirýstykine uqsaityn pnevmoniia esebi bar. Úkimet ol esepti byltyr 1 tamyzda bastaǵan. Sodan beri 60 myńnan astam adamǵa osyndai diagnoz qoiylǵan.
Qazaqstanda resmi esep boiynsha, 2020 jyldyń naýryzynan beri 5866 adam koronavirýstan kóz jumǵan. Byltyrǵy tamyz aiynan beri koronavirýs pnevmoniiasynan 3711 adam marqum bolǵan.
Kei sarapshylar koronavirýs boiynsha resmi málimetke senbei, virýs juqtyrǵandar men odan qaitys bolǵandardyń shynaiy sany budan áldeqaida kóp dep sanaidy.
Qazaqstanda aqpan aiynan beri halyqqa koronavirýsqa qarsy vaktsina salynyp jatyr. Densaýlyq saqtaý ministrliginiń dereginshe, osy kezge deiin 5,4 millionǵa jýyq adam vaktsinanyń birinshi dozasyn alǵan. Ekpeniń tolyq dozasyn alǵandar 3,7 millionnan asty.
