1 tamyzda Qazaqstanda 7573 adamnyń koronavirýs testi oń shyqty. Densaýlyq saqtaý ministrligi dúisenbi kúni tańerteń osylai dep habarlady.
31 shildede 87 adamǵa koronavirýs pnevmoniiasy diagnozy qoiylǵan. 102 adam qaitys bolǵan: 86 adam – koronavirýstan, 16 adam koronavirýs pnevmoniiasynan kóz jumdy dep aitylady.
Elde virýstyń beti áli qaitpady. Jeksenbi kúni Nur-Sultanda – 1489, Almatyda – 1540, Qaraǵandy oblysynda – 901, Shymkentte 650 naýqas tirkelgen. Atyraý oblysynda 408 adamnan koronavirýs anyqtalǵan. Qalǵan oblystarda 85-300 aralyǵynda naýqas tirkelgen. Qazir barlyq oblys pen qala "qyzyl aimaqta" tur.
2 tamyzdaǵy málimeti boiynsha elde 101 702 adam koronavirýs infektsiiasynan (98 951 KVI+ jáne 2 751 KVI-) emdelip jatyr. Olardyń ishinde 28 541 patsient statsionarda, 73 161 naýqas ambýlatoriialyq deńgeide em qabyldap júr.
KVI+, KVI- shaldyqqandardyń arasynda:
1 676 adamnyń jaǵdaiy aýyr,
402 patsienttiń jaǵdaiy óte aýyr.
196 naýqas ÓJJ apparatynda jatyr.
Bilik indettiń órshýin delta varianttyń taraýymen bailanystyrady. "Delta" koronavirýstyń kádimgi túrine qaraǵanda jyldam juǵady jáne asqynýy da tez. Resmi málimet boiynsha, Qazaqstanda delta maýsym aiynda tirkelgen.
2020 jyldyń naýryz aiynan beri 587 myń adamnyń koronavirýs testi oń shyqqan. Odan bólek, 61 myńnan astam adam koronavirýs pnevmoniiasyna shaldyqqan.
Byltyr naýryz aiynan beri 6043 adam koronavirýstan qaitys boldy dep aitylady. Tamyz aiynan beri koronavirýs pnevmoniiasy 3740 adamnyń ólimine sebep bolǵan. Buǵan qosa, koronavirýs juqsa da, "basqa aýrýdan qaitys boldy" dep tanylǵan keminde 2 myńnan astam adam ólimi koronavirýs statistikasyna engizilmegen.
Kei sarapshylar koronavirýs boiynsha resmi málimet tym tómendetilgen, shyn máninde virýs juqtyrǵandar men odan qaitys bolǵandar áldeqaida kóp dep sanaidy.
Qazaqstanda aqpan aiynan beri halyqqa koronavirýsqa qarsy vaktsina salynyp jatyr. Sodan beri 5,4 million adam vaktsinanyń birinshi dozasyn alǵan. Ekpeniń tolyq dozasyn alǵandar 3,7 millionnan asty.
