8 shildede Qazaqstanda 2909 adamnyń koronavirýs testi oń shyqty. Bul týraly 9 shildede tańerteń densaýlyq saqtaý ministrligi habarlady. 2020 jyldyń naýryz aiynan beri 448 000 adamǵa koronavirýs juqqany arnaiy testpen dáleldengen. Kóp maman koronavirýs boiynsha resmi málimet tómendetilip kórsetilgen, shyn máninde virýs juqtyrǵandar áldeqaida kóp dep sanaidy.
Ótken táýlikte Nur-Sultanda – 796, Almaty qalasynda – 420, Qaraǵandy oblysynda – 321, Shymkentte – 210, Batys Qazaqstan oblysynda – 191, Atyraý oblysynda – 154, Pavlodar oblysynda – 123, Aqmola oblysynda – 119, Mańǵystaý oblysynda 111 adamnan koronavirýs anyqtaldy. Almaty oblysynda – 89, Shyǵys Qazaqstan oblysynda – 78, Aqtóbe oblysynda – 77, Qostanai oblysynda – 54, Qyzylorda oblysynda – 46, Túrkistan oblysynda – 44, Jambyl oblysynda – 38, Soltústik Qazaqstan oblysynda 38 naýqas tirkelgen.
7 shildede 140 adam pnevmoniianyń koronavirýsqa uqsas túrine shaldyqqan. Onyń aldynda bul kórsetkish 26 bolǵan. PTR nátijesi teris, biraq simptomdary koronavirýsqa uqsas "pnevmoniia" statistikasy byltyr tamyzdan beri júrgizilip keledi. Ministrlik málimetinshe, sodan beri elde 57 630 adam "pnevmoniianyń" sol túrine shaldyqqan. Halyqaralyq sarapshylar pnevmoniianyń koronavirýsqa uqsas túrin Covid dep sanaidy. Biraq Qazaqstan densaýlyq saqtaý ministrligi koronavirýs pnevmoniiasyn Covid statistikasyna qospai keledi.
Sársenbi kúni koronavirýs testi oń shyqqandar arasynda 32 adam ólimi tirkelgen, 5 adam koronavirýs pnevmoniiasynan qaitys bolǵan. Indet bastalǵaly beri resmi málimet boiynsha, 4576 adam – koronavirýstan, 3481 adam koronavirýs pnevmoniiasynan qaitys bolǵan.
Koronavirýsqa qatysty adam ólimi statistikasyna virýsqa shaldyqqan myńnan asa adam marqum enbei qaldy. Ministrlik qurǵan komissiia olardyń qazasyna basqa dert sebep boldy dep tapqan.
Ministrliktiń málimetinshe, qazir 36 myńnan astam adam koronavirýstan emdelip jatyr, basym bóliginiń koronavirýs testi oń shyqqan. 11 myńnan astam patsient statsionarda jatyr: shamamen 904 adamnyń jaǵdaiy aýyr nemese óte aýyr. 93 adam jasandy tynys apparatyna qosylǵan.
Qazir eldegi iri úsh qala men jeti oblys "qyzyl aimaqta": Nur-Sultan, Almaty, Shymkent qalalary, Aqtóbe, Aqmola, Atyraý, BQO, Qaraǵandy, Mańǵystaý jáne Pavlodar oblystary. Qostanai, SQO, Qyzylorda, Almaty, Jambyl oblystary virýs taraýy jaǵynan ortasha "sary aimaqta" tur. Qalǵan Túrkistan men Shyǵys Qazaqstan oblystary – "jasyl aimaqta".
Ministrliktiń dereginshe, 8 shildege deiin 4 millionnan astam adam koronavirýsqa qarsy ekpeniń bir dozasyn; 2,33 mln adam eki dozasyn alǵan. Elde reseilik "Spýtnik V", qazaqstandyq QazVac, HayatVax (BAÁ elinde daiyndalǵan Qytaidyń ekpesi), qytailyq Coronavac ekpesin salyp jatyr.
AQSh-taǵy Djons Hopkins ýniversitetiniń esebinshe, indet bastalǵaly beri álemde 185,5 mln adam Covid dertine shaldyqqan. 4 millionnan astam adam qaitys bolǵan.
