Shyǵys Qazaqstan oblysynda karantin sharalary óz nátijesin berip, óńir koronavirýstyń taralý qaýpi boiynsha «qyzyldan» «sary» aimaqqa ótti, dep habarlaidy "Ult aqparat".
«Ortaq kúsh-jigerimizdiń jáne aimaq halqynyń joǵary jaýapkershiliginiń arqasynda biz COVID-19 infektsiiasynyń taralý deńgeiin tómendete aldyq. Búginde oblysta koronavirýstyń taralý koeffitsienti báseńdedi. Virýs juqtyrǵandar sany 7 qarashada 353 adam bolsa, keshe 73-ti qurady. Eń bastysy, óńirimizde Oqshaýlaý ortalyǵy arqyly virýstyń juqtyrý tizbegin baqylaý jáne tosqaýyl qoiý júiesi qurylǵan. 1 qarashadan bastap 584 meditsinalyq-epidemiologiialyq top infektsiianyń 3,5 myń oshaǵynda bailanysta bolǵan 21 618 adammen jumys júrgizdi», - dep jazdy aimaq basshysy Danial Ahmetov Facebook-paraqshasynda.
Sondai-aq COVID-19 infektsiiasyn ýaqtyly anyqtap, emdeý úshin qoldanystaǵy 13 PTR-zerthanaǵa jergilikti biýdjet esebinen qosymsha 6 zerthana qosylǵan. Aldaǵy kúnderi taǵy bir zerthana ashylmaq.
«Pandemiia bastalǵannan beri ShQO-da 355 myń test ótkizildi, onyń ishinde tek qarashada 101 095 myń zertteý júrgizildi. Bul el boiynsha joǵary kórsetkishterdiń biri. Monitoringtik toptar da tiimdi jumys atqardy. 1 qarashadan bastap 166 toppen 1906 reid júrgizildi, 4426 nysan tekserildi, onyń 1055-inde zańbuzýshylyqtar anyqtalyp, 48 mln teńgege 735 aiyppul salyndy», - dedi oblys ákimi.
Onyń aitýynsha, 12 qarashadan bastap naýqastardyń kelisimimen oblys aýrýhanalarynda «Favipiravir» preparaty qoldanylýda. Osynyń nátijesinde syrqattan saýyqqan azamattar sany artqan. Sonymen qatar donorlardyń kómegimen jinalǵan 3200 immýndy plazma belsendi túrde qoldanylyp jatyr.
«Osy jáne basqa da sharalardyń arqasynda biz koronavirýstyń «sary aimaǵyna» óttik. Bul, qoldanystaǵy shekteýlerge birqatar jeńildikter engizýge múmkindik beredi. Alaida ázirge qaýipti dertten qorǵaityn vaktsina joq, sondyqtan KVI-den eń senimdi qorǵanys – saqtyq sharalary men áleýmettik qashyqtyq ekenin umytpaý kerek. Bizdiń qazirgi basty mindetimiz – virýstyń taralýyna jol bermeý, meditsinalyq mekemelerdiń tiimdiligin arttyrý jáne halyqtyń densaýlyǵyn saqtaýdy qamtamasyz etý. Ózińiz ben jaqynyńyzǵa qorǵan bolyńyz!», - dedi Danial Ahmetov.
