Almatyda koronavirýs juqtyrǵandardyń sany 1353-ke jetti. Bul týraly búgin onlain brifing barysynda qalalyq Qoǵamdyq densaýlyq saqtaý basqarmasynyń basshysy Tileýhan Ábildaev aitty, dep habarlaidy QazAqparat.
Onyń aitýynsha, Almatyda qazirgi ýaqytta koronavirýstyq infektsiiany juqtyrýdyń rastalǵan 1353 jaǵdaiy tirkeldi.
«Búginde Covid-19-dan infektsiialyq statsionarlarda 1135 patsient emdeýde jatyr. Bir patsienttiń jai-kúii – óte aýyr, 34-inde – aýyr, 289-ynda – aýyrlyqtyń ortasha dárejesinde bolsa, qalǵandarynyń jaǵdaiy – qanaǵattanarlyq. 12 665 almatylyq meditsinalyq baqylaýǵa alynǵan. Onyń ishinde 312-i - provizorlyq statsionarda, 345-i - karantindik gospitaldarda, 12 008-i úi karantininde otyr», - dedi T.Ábildaev.
Basqarma basshysy aýrýhanaǵa jatqyzylǵandar ishinen aýyr haldegi naýqastar sany sońǵy ýaqytta kóbeimegenin aitty.
«Tájiribe kórsetip otyrǵandai, koronavirýsty juqtyrǵanda naýqastyń qosymsha aýrýlary jaǵdaiyn aýyrlata túsedi. Sondyqtan, sozylmaly aýrýlary bar, ásirese tynys alý júiesi, júrek-qan tamyrlary buzylystary bar barlyq adamdarǵa testileý jasaýǵa basymdyq beriledi. Sondai-aq, Covid -19 qaýip tobyna JRVI, pnevmoniia belgileri bar adamdar, meditsina qyzmetkerleri, qala aýmaǵyndaǵy ár túrli áskeri bólimderden áskeri qyzmetshiler, karantinge qoiylatyn talaptardyń saqtalýyn baqylaý maqsatynda patrýldeýshi quram, IIM júiesiniń qyzmetkerleri, buǵattaý beketterine jumysqa tartylǵan adamdar engizilgen. Qala boiynsha atalǵan kontingent Almaty qalasy Bas sanitarlyq dárigeriniń kestesine sáikes koronavirýstyq infektsiiaǵa mindetti túrde tekserilip jatyr», - dedi T. Ábildaev.
