Almaty ákimi Baqytjan Saǵyntaev QR Prezidenti janyndaǵy Ortalyq kommýnikatsiialar qyzmetinde ótken brifingide pandemiianyń jańa tolqyny men megapolistiń sanitarlyq-epidemiologiialyq qaýipsizdigin qamtamasyz etýge qatysty sharalar týraly aitty, dep habarlaidy "Ult aqparat".
Almatyda 7011 tósek-oryny bar 23 statsionar daiyndaldy. Pandemiia kezinde Almatyda úsh jańa infektsiialyq statsionar salyndy — 2 modýldi klinika jáne RV-90 gospitali. Jeke investitsiialar esebinen eki klinika qaita quryldy.
«Klinikalardyń materialdyq-tehnikalyq bazasyn nyǵaitý boiynsha jumys júrgizilip jatyr. Ótken jyly mekemelerdi meditsinalyq jabdyqtarmen jaraqtandyrýdy jańǵyrtýdyń úsh jyldyq baǵdarlamasy qabyldandy. Biyl 74 statsionar men klinika úshin 4197 birlik qural-jabdyq satyp alyndy», — dedi Almaty ákimi B. Saǵyntaev.
Onyń keltirgen málimetteri boiynsha, jedel meditsinalyq kómek kórsetý jumysy jáne naýqastardy baǵdarlaý jańa algoritmge aýystyryldy. Jańa 35 jedel járdem kóligi satyp alyndy. 16 jeltoqsanǵa deiin qosymsha 50 mashina keledi. 2021 jyldyń basynda taǵy 50 kólik alynbaq.
Jalpyqalalyq zerthanalyq jeli men patsientterdi diagnostikalaý jumysy ortalyqtandyryldy. Jalpy, qýattylyǵy táýligine 14 myńnan astam PTR-zertteýlerin 22 myńǵa deiin keńeitý múmkindigi bar.
Qalalyq statsionarlar úshin tikelei qoljetimdi KT-, MRT-, rentgen-sýretterdiń biryńǵai banki quryldy. Jasandy intellektige negizdelgen AT platformasy ókpeniń eń kóp zardap shekken aimaǵyn anyqtaidy. Ol dárigerlerge naqty diagnoz qoiýǵa jáne em-domnyń sapasyn jaqsartýǵa kómektesedi.
Sonymen birge, ambýlatorlyq deńgeide meditsinalyq kómek kórsetýdiń mańyzdy býyny (túiini) bolyp tabylatyn alǵashqy meditsinalyq-sanitarlyq kómektiń jumysy kúsheitildi.
«Ótken jyly biz jaqyn ornalasqan qoljetimdi jerden meditsinalyq qyzmet túrlerimen qamtamasyz etý boiynsha úsh jyldyq qalalyq jospardy qabyldadyq. Barlyǵy 35 ambýlatoriia salynady. 16 ambýlatoriia iske qosyldy, kelesi jyly taǵy 11 ambýlatoriia paidalanýǵa beriledi», — dep atap ótti megapolis ákimi B. Saǵyntaev.
Birinshi eshelon statsionarlaryn meditsinalyq gazben, sonyń ishinde otteginiń ortalyqtandyrylǵan júiesimen qamtamasyz etý jónindegi jalpyqalalyq baǵdarlama iske asyrylýda. Qalanyń meditsinalyq uiymdarynyń káriz sýlarynyń biologiialyq qaýipsizdigi rejimi engizildi. Meditsinalyq qaldyqtardy kádege jaratýǵa baqylaý kúsheitildi.
