Chili ánshisi qazaqstandyq juldyz Dimash Qudaibergenniń ánderin ispan tiline aýdaryp, oryndap júr, dep habarlaidy dimashnews.com resýrsy.
Djonatan Donoso – talantty vokalisterdiń biri. Onyń Dimash ánderin ispan tilinde oryndap, tyńdarmandarǵa kaver arqyly jetkizip júrgenine bir jyldan asty. Osylai ol kópke ónerde til kedergisiniń joqtyǵyn dáleldep, qazaqstandyq oryndaýshynyń shyǵarmalarynan shabyt alyp júr.
Chili ánshisi Djonatan Donoso bala kezden shyǵarmashylyqqa bet burdy. Segiz jasynda festivaldarǵa qatysyp, án jáne animatsiialyq keshterde óner kórsetti. Osylai mýzykaǵa alǵashqy qadam basty. Jasy 32-ge kelgen ánshiniń áli kúnge deiin án ónerine súiispenshiligi óshken emes.
Djonatan Chilidegi shaǵyn, biraq óte ádemi qala Renoda dúniege kelgen. Qazir ol súiiktisi Anita Ligerospen birge San-Fernandoda turady. Emiliia, Martin jáne Danai esimdi úsh balasy bar.
Djonatan bir jyl buryn Dimashtyń «S.O.S» ánin oryndap, Youtube jelisine júktegen bolatyn. Óziniń aitýynsha, osy sátten bastap onyń ómiri túbegeili ózgerdi.
Osydan keiin Djonatan qazaq uly Dimashtyń shyǵarmalaryn qalt jibermei qadaǵalap otyrǵan. Jańa ánderin taǵatsyzdana kútýdi ádetke ainaldyrdy. Onyń ánderine kaver jasaýǵa qushtarlyǵy oiandy. Shyǵarmany qaita oryndaý ǵana emes, ánniń mátinin ispan tiline aýdaryp oryndaýdy qolǵa aldy.
«Ándi tyńdaǵan kezde men onyń maǵynasyn túsinbeimin, óitkeni basqa tilde. Biraq ol maǵan qatty unap, bir áreket jasaýǵa belgi bergendei boldy. Bul sezim Dimashtyń «Give Me Love» ánin tyńdaǵan kezde paida boldy. Ánniń áýeni qatty áser etti de birden aýdarmasyn izdedim. Aýdarmasy tipti tańqaldyrdy. Mátin meniń basymnan ótken qiyn kezeńder men oilarymdy sipattaǵandai bolyp, birden kaver jasaimyn dep sheshtim», – deidi vokalist.
Djonatan ánniń aýdarmasynyń úsh nusqasyn taýyp, ispan tilinde ádebi mátin jazdy. Osydan keiin, óziniń alǵashqy shyǵarmasyn oryndap, vokalist ony Smule jáne YouTube platformasyna júktedi.
Djonatannyń kompozitsiia nusqasyna Dimashtyń Dear-larynan qyzyqty pikirler kele bastady. Bul vokalist úshin kútpegen jaǵdai boldy. Ony qoldaǵandar Djonatannan tańǵajaiyp shyǵarmalaryn toqtatpaýdy surap, jalǵasyn kútetinin jetkizdi. Buǵan deiin qazaqstandyq ánshiniń shyǵarmasyn ispan tilinde eshkim estimegen.
Sol kúnnen bastap Djonatan Dimashtyń ánderine kóbirek kaver jasaý týraly sheshim qabyldady. Osylaisha onyń mýzykasynyń Latyn Amerikasyna taralýyna yqpal etti.
Djonatannyń arnasyndaǵy sońǵy videolardyń biri - Dimashqa arnaiy jazylǵan kýeka. Vokalist bul arnaýdy Anita Linerospen birge oryndady.
