UEFA Chempiondar ligasy 2020/2021 jylǵy kezeńiniń finalynda qai komandalardyń synǵa túsetini tolyqtai anyqtaldy, dep habarlaidy "Ult aqparat".
Búgin Germaniianyń «Bavariia» jáne Frantsiianyń «Lion» komandalary kezdesti. Jankúierler jeńiske nemis klýby jetedi degen boljam jasap qoiǵan edi.
Tájiribeli ujymnyń qatarynda sanalatyn «Bavariia» bul joly da syr bergen joq. Frantsýz fýtbolshylary alǵashqy minýttarda basymdyǵyn baiqatty. Ýaqyt óte kele nemis komandasy tizgindi óz qolyna aldy.
«Bavariia» sapynan jas shabýylshy Serj Gnabri eńbekqorlyǵymen kózge tústi. Ol 18 jáne 33-minýttarynda qos goldyń avtory atandy.
Ekinshi kezeńde oiyn alma-kezek shabýylymen órbidi. Dese de eki komanda tarapynan gol soǵatyn kóptegen múmkindikter bosqa ketti. Oiynnyń 88-minýtynda «Bavariia» shabýylshysy Robert Levandovski kezdesýdiń núktesin qoidy. Osylaisha «Bavariia» qarsylasynan 3:0 esebimen basym tústi.
Budan buryn Frantsiianyń «Pari Sen-Jermen» komandasy Germaniianyń «Leiptsig» klýbynan 3:0 esebimen basym tústi. Osylaisha frantsiialyq fýtbolshylar finalǵa joldama aldy.
Aita keter bolsaq, Chempiondar ligasynyń shirek finalynan bastap qalǵan bóligi Portýgaliia astanasy - Lissabon qalasynda ótip jatyr. Ol segizdik finaly formatynda oinalýda. Final 23 tamyzda ótkiziledi. Onda «Bavariia» jáne «Pari Sen-Jermen» komandalary synǵa túsedi.
