Búgin elordalyq «Astana» UEFA Chempiondar ligasy birinshi irikteý satysynda Belarýs «Dinamo» (Brest) komandasymen kezdesedi, dep habarlaidy "Ult aqparat".
Elordalyq klýb irikteý satysyn syrt alańda bastaidy.
Esterińizge sala ketelik, jeńimpaz nebári bir ǵana oiynnyń nátijesi boiynsha belgili bolady. Bul - álemdegi koronavirýs infektsiiasy jaǵdaiyna bailanysty qabyldanǵan sheshim. Sondyqtan qos komanda úshin atalǵan kezdesý tartysty ótetini belgili.
Jankúier kózine kóbirek túse qoimasa da, «Dinamo» (Brest) klýbynyń alpys jyldyq tarihy tasqa basylǵan. Toqsanynshy jyldarǵa deiin zor tabysymen kózge túse qoiǵan joq. Ekinshi ligada oiyn kórsetti. Táýelsizdik alǵannan keiingi Belarýs chempionatynyń barlyǵynda baq synap kele jatqan sanaýly komandanyń biri bolyp tabylady.
Biylǵy jylǵa deiin ortanqol ujymnyń qatarynda sanalyp keldi. 1992 jyly óz elinde qola júldeger boldy. Odan keiin tórtinshi-besinshi orynnan árige asa almaityn. 2016 jyly komanda Birikken Arab Ámirliginde tirkelgen «Sohra Overseas» kompaniiasynyń qaraýyna ótti.
Keiinnen atalǵan kompaniiany kásipker Sergei Zaitsevtiń ieliginde ekeni belgili boldy. Brest oblysynda dúniege kelgen ol «Dinamoǵa» kórsetken qoldaýy jóninde óz pikirin bildirip ótti. «Men bala kezimnen «Dinamoǵa» jankúier boldym. Birneshe jyl buryn komanda bankrotqa ketýge az qaldy.
Osylaisha komanda Belarýs chempionatynyń joǵary ligasynan tómendeýi múmkin edi. Sol sátte olarǵa qoldaý bildirýge sheshim qabyldadym», - dedi ol.
Bul komanda fýtboldan Belarýs kýbogynda 2006/2007, 2016/2017, 2017/2018 jyldarda jeńimpaz atandy. Nátijesinde Eýropa ligasy (ÝEFA kýbogy) oiyndarynda úsh márte baq synaýǵa múmkindik aldy. Degenmen osy týrnirde 2007/2008 jylǵy kezeńde birinshi irikteý satysynda Latviianyń «Metallýrg» (Liepai) komandasymen kezdesip, qarsylasyna jol berip qoidy. Syrt alańda 1:1 esebimen teń túskenimen, óz alańynda 1:2 esebimen jeńilip qaldy. 2017/2018 jylǵy kezeńde de dál osyndai jaǵdai qaitalandy. Avstriianyń «Altah» klýbymen syrt alańda 1:1 esebimen teń túsip, óz alańynda 0:3 esebimen jol berdi. Al 2018/2019 jylǵy kezeńde óz
tarihynda eýrokýbok oiyndarynyń ekinshi satysyna joldama aldy.
Aldymen Grekiianyń «Atromitos» klýbyn (4:3, 1:1) orta jolda qaldyryp, odan keiin Kiprdiń «Apollon» klýbyna (1:0, 0:4) jol berip qoidy.
Komanda quramynda ataǵy keńge jaiylǵan tanymal fýtbolshylar joq.
Dese de Artem Milevskii, Evgenii Hacheridi sekildi kezinde Ýkraina ulttyq quramasynyń namysyn qorǵaǵan tájiribeli sportshylar bar.
Olardan basqa da sheberligi shyńdalǵan fýtbolshylar kezdesedi.
Al «Astana» bizdiń elimizdiń atynan altynshy jyl qatarynan Chempiondar ligasynyń irikteý kezeńinde synǵa túsip keledi. Máselen, 2015/2016 jylǵy kezeńde atalmysh týrnirdiń toptyq kezeńine deiin jetti. Odan keiingi úsh jylda eki márte úshinshi irikteý kezeńinen asa almasa, bir márte plei-off kezeńine deiin bardy. Nátijesinde olarǵa sońǵy tórt jylda Eýropa
ligasynyń irikteý kezeńine qatysýǵa múmkindik berildi. Odan súrinbei etken elordalyqtar toptyq kezeńinde el namysyn qorǵady. Al 2016/2017 jylǵy kezeńde Eýropa ligasynda jarystyń 1/16 finalyna deiin jetti. Odan keiin toptyq kezeńnen ári asa alǵan joq.
Esterińizge sala ketelik, «Dinamo» (Brest) jáne «Astana» komandalary arasyndaǵy kezdesý elorda ýaqytymen 00.00-de bastalady. Oiyn «Qazsport» telearnasynan tikelei efirde kórsetiledi.
