Biryńǵai jinaqtaýshy zeinetaqy qory elimizde zeinetaqy jinaqtaryn turǵyn úi jaǵdaiyn jaqsartýǵa belsendi paidalanyp jatqan óńirlerdi atady, dep habarlaidy "Ult aqparat" qordyń baspasóz qyzmetine silteme jasap.
«8 aqpanyndaǵy jaǵdai boiynsha ýákiletti operatorlardan Biryńǵai jinaqtaýshy zeinetaqy qoryna nysanaly paidalaný úshin merziminen buryn tólemderdi júzege asyrýǵa shamamen 90 689 salymshynyń ótinishi kelip tústi. 50 350 ótinish oryndaldy jáne salymshylar ýákiletti operatorlarda ashylǵan ózderiniń arnaiy shotyna shamamen 276 mlrd teńge mólsherinde birjolǵy zeinetaqy tólemin (BZT) aldy. Tólemderdiń ortasha somasy 5,5 mln teńge», delingen habarlamada.
Qordyń málimetinshe, 73,7 mlrd teńgege jýyq 14 myńnan astam ótinish tólemdi júzege asyrý úshin óńdelip jatyr. Zań talaptaryna sáikes kelmegen 26,3 myńǵa jýyq ótinim qabyldanbaǵan.
«Respýblika boiynsha ótinishterdiń eń kóp sany - 19 209 ótinish (nemese 21,18%) Almaty qalasynda qabyldandy. Onyń 11,3 myńǵa jýyǵy oryndaldy. Ýákiletti operator bolyp tabylatyn bankterdegi salymshylardyń arnaiy shotyna shamamen 69,6 mlrd teńge aýdaryldy. Tólemderdiń ortasha somasy 6,18 mln teńge. 14,7 mlrd teńgege taǵy 2 579 ótinish óńdelip jatyr.
Nur-Sultan qalasynyń turǵyndarynan 15 371 ótinish (shamamen 17%) qabyldandy. 8 698 salymshy arnaiy shoty arqyly 45,3 mlrd teńgeden astam qarajat aldy. Tólemderdiń ortasha somasy 5,2 mln teńge. Óńdeýde 10,5 mlrd teńge somaǵa 2 156 ótinish bar.
Mańǵystaý oblysynda BZT alýǵa 12 757 ótinish qabyldandy (14%). 7 062 ótinish oryndaldy – 61 mlrd teńgeden astam qarajat salymshylarǵa turǵyn úi jaǵdaiyn jaqsartýǵa aýdaryldy. Oblystaǵy tólemderdiń ortasha somasy 8,65 mlrd teńgeni qurady. Jalpy somasy 21,5 mlrd teńge bolatyn taǵy 2 519 ótinish qaralyp jatyr», delingen habarlamada.
