QR Indýstriia jáne infraqurylymdyq damý ministri Beibit Atamqulov jumys saparymen Jambyl oblysyna kelip, salaǵa qatysty birqatar máselelermen tanysty, dep habarlaidy "Ult aqparat".
Naqtyraq aitsaq, ministr Beibit Atamqulovtyń, Jambyl oblysynyń ákimi Berdibek Saparbaevtyń qatysýymen Shý aýdanynda arnaiy keńes ótti. Jiynda kóterilgen máselelerdiń biri - «Taraz» Himpark» arnaiy ekonomikalyq aimaǵynyń basqarýshy kompaniiasyna qatysty kóptegen syn aityldy.
«Sońǵy jyldary is júzinde eshqandai ózgeris joq. Ótken jyly qant zaýytynyń qurylysy bastalýy kerek edi, áli sol qalpynda tur. Milliardtaǵan biýdjet qarjysy jumsalǵanymen, nátijesi joq deýge bolady. Sonymen qatar, munda úlken jalaqysy bar kóptegen shtat ashylǵan. Eger jumys isteitin jobalary bolmasa, olar ne úshin aqsha alyp otyr?» – dedi oblys ákimi Berdibek Saparbaev.
Belgili bolǵandai, basqarýshylar shtaty 147-den 75 adamǵa deiin qysqartylǵan. Munda 16 nysan paidalanýǵa berilgen jáne olar tek injenerlik infraqurylymǵa ǵana qatysty.
Aimaq basshysy ministrge «Taraz» Himpark» AEA-ny damytý máselesin qarastyrý úshin arnaiy selektorlyq keńes shaqyrýdy usyndy. Usynys qabyldandy.
«Kelisemin, salynǵan qarajat aýqymdy, olardyń jumsalýy boiynsha esep berý kerekpiz», - dep atap ótti Beibit Atamqulov.
Aita keteiik, «Taraz» Himpark» – bul Qazaqstan aýmaǵyndaǵy onynshy arnaiy ekonomikalyq aimaq. «TARAZ INVEST-2012» halyqaralyq forýmynda «Samuryq-Qazyna» UÁQ» AQ-ǵa qarasty «Birikken himiialyq kompaniia» JShS jobanyń tusaýyn kesken bolatyn. Onda investorlar úshin qolaily jaǵdailar, qolaily preferentsiialar jáne qajetti resýrstar men infraqurylymdy qamtamasyz ete otyryp, joǵary tiimdi tehnologiialarǵa negizdelgen jańa himiialyq zaýyttar qurý josparlanǵan bolatyn. Ol úshin 505 gektar jer qarastyrylǵan.
Basqosý sońynda oblys ákimi Berdibek Saparbaev Jambyl oblysynda bitým shyǵaratyn zaýyt salýdy usyndy.
«Jer bólý jáne infraqurylym júrgizýde eshqandai másele bolmaidy. Sondai-aq, qurylys uiymdary biznestiń áleýmettik jaýapkershiligi siiaqty tujyrymdamany umytpaýy tiis. Jergilikti jurtshylyqtyń áleýmettik máselelerin sheshýge kómektesińizder», - dedi aimaq basshysy.
