Senattyń Ekonomikalyq saiasat, innovatsiialyq damý jáne kásipkerlik komiteti himiia ónerkásibin damytý kelesheginiń problemalaryna arnalǵan dóńgelek ústel otyrysyn uiymdastyrdy, dep habarlaidy "Ult aqparat".
Memleket basshysynyń «Jańa jaǵdaidaǵy Qazaqstan: is-qimyl kezeńi» atty Joldaýynda ónerkásiptiń áleýetin tolyq paidalaný Qazaqstannyń aldynda turǵan asa mańyzdy mindet ekeni atap ótilgen bolatyn.
«Qazaqstannyń himiia salasy aýyl sharýashylyǵynda, qurylysta, munai ónerkásibinde, tamaq óndirý salasynda, farmatsevtikada jáne t.b. salalarda kórinis taýyp otyr. Túrli tutyný zattaryn jasaýda da salanyń ónimderi keńinen qoldanylady. Himiia ónerkásibi óz kezeginde óńdeýshi ónerkásiptiń oń qarqynmen ósip kele jatqan salasynyń biri bolyp otyr. Qazirgi zamanǵy jahandyq jáne ishki trendter jaǵdaiynda himiia ónerkásibi birqatar júieli problemalar men onyń budan bylaiǵy turaqty damýyna áser etetin tejeýshi faktorlarǵa tap boldy», - dedi Ekonomikalyq saiasat, innovatsiialyq damý jáne kásipkerlik komitetiniń tóraǵasy Dáýren Ádilbekov.
Depýtat Álimjan Qurtaev himiia ónerkásibi - bul ekonomikanyń ónimdiligi joǵary ári investitsiianyń qaitymy tez mańyzdy sektory ekenin atap ótti.
«Qazaqstannyń munai-gaz kesheniniń basym mindeti shikizat satý emes, jumys istep turǵan munai óńdeý zaýyttaryn qurylymdyq qaita qurý jáne kómirsýtegi shikizatyn tereńdete qaita óńdeýdiń joǵary sapaly ónimderimen almastyrý maqsatynda munai-himiia kásiporyndaryn salý bolýy tiis. Qazaqstan úshin himiia ónerkásibiniń strategiialyq mańyzy bar. Ishki naryqtaǵy himiia ónimderine degen qajettilik jylyna 3,5 mlrd dollardy qurasa, jyl saiyn shamamen 2,4 - 2,8 mlrd dollar turatyn himiialyq ónimdi importtaidy. Qazaqstan birqatar himiialyq zaýyttar qurýǵa mindetti», - dedi senator.
Depýtat munai óndirý kezinde kóp mólsherde tiimdi óńdeýge bolatyn ilespe gazdyń bosqa jaǵylatynyn eske saldy. Biraq otandyq munai-himiia ishki naryqtyń tek 20%-yn ǵana qamtamasyz etedi.
Álimjan Qurtaevtyń aitýynsha, himiia ónerkásibi salasyndaǵy jetistikter mashina jasaý, avtomobil jasaý, aeroǵarysh ónerkásibi, energetika, orman sharýashylyǵy, jeńil ónerkásip jáne aýyl sharýashylyǵynyń básekege qabilettiligin kórsetedi.
«Qazaqstan shikizat bazasy boiynsha básekeli artyqshylyqtarǵa ie bola otyryp, ótpeli kezeńde mineraldyq tyńaitqyshtardy ázirleý jáne munai-gaz himiiasy sektorynda áleýetti qurý úshin óz ǵylymi bazasyn damytýǵa kóshý qajet. Qazaqstan Respýblikasynyń 2020-2025 jyldarǵa arnalǵan údemeli-indýstrialdy damý baǵdarlamasy 2019 jyly qabyldandy. Atalǵan baǵdarlamada óńdeý óndirisiniń barlyq baǵyttary qamtylǵan. Degenmen, jumsalǵan investitsiia jyldam, ári birneshe eselenip qaitatyn, biýdjettiń kiris bóligin qomaqty etip toltyratyn himiia óndirisine erekshe kózqaras kerek, sol arqyly biýdjetti aitarlyqtai tolyqtyrýǵa bolady», - dep atap ótti Álimjan Qurtaev.
Dóńgelek ústel barysynda aitylǵan barlyq máseleler, usynystar men eskertýler qaralyp, zerdelenedi jáne Úkimetke, ýákiletti memlekettik organdarǵa usynymdar men depýtattyq saýaldar túrinde jiberiletin bolady.
Otyrysqa memlekettik organdardyń, himiia ónerkásibi kásiporyndarynyń, «Atameken» ulttyq kásipkerler palatasynyń ókilderi jáne ǵalymdar qatysty.
