Almatyda Áýezov aýdanynyń ákimi Sairan Saifedenov halyqpen esepti kezdesýin ótkizdi. Jiyn barysynda qala ákimi Baqytjan Saǵyntaev qala turǵyndarynyń ózekti suraqtaryn tyńdady, dep habarlaidy "Ult aqparat".
Aýdan ákimi ótken jyldyń áleýmettik-ekonomikalyq damý qarqynyn baiandai kelip, eń aldymen turǵyndardy tolǵandyratyn infraqurylymdyq máselelerdi sheshý týraly aitty.
Taýgúl-3 yqshamaýdanynda injenerlik jelilerdi damytý maqsatynda 22 km sý qubyry jáne 22,7 km káriz júiesi tartyldy.
Aýdandy jaryqtandyrý úshin Baian aýyl, Altyn besik yqshamaýdandarynda, Altynsarin, Abai dańǵyldarynyń, Ótegen batyr, Seiitjanov kósheleriniń boiyna, №8 yqshamaýdanǵa uzyndyǵy 15 shaqyrym bolatyn 469 jaryq kózi ornatyldy. 1137 jaryq núktesi qoiylatyn Dostyq yqshamaýdanynda jaryqtandyrý qurylysy aiaqtalyp keledi.
Aýdanda barlyǵy 966 aýla bar. 4 jyldyń ishinde 336 aýla (38%) jóndeldi, onyń ishinde 96 aýla ótken jyly jańardy. 150 aýlany jóndeý boiynsha JSQ ázirlendi.
Áýezov aýdanynyń yqshamaýdandary «bir yqshamaýdan – bir mektep – bir bala baqsha – jaiaý júrginshi aimaǵy» qaǵidaty boiynsha jobalanǵan. Qazirgi kezde yqshamaýdandar ishindegi jaiaý júrginshi aimaqtary qaraýsyz qalǵan, sondyqtan №8 yqsham aýdandaǵydai №10 yqshamaýdanda abattandyrý jumystary júrgiziletin bolady.
Aýdan turǵyndarynyń skverler men parkterdiń jetispeitini týraly ótinishterin eskergen ákim bul máseleni «Biýdjetke qatysý» jobasy arqyly sheshýge bolatynyn aitty.
«Áýezov aýdanynyń turǵyndary osy joba boiynsha bólingen 500 mln teńgeniń jartysynan azyna ǵana iske asatyn ideialardy usyndy. Ózderińizdiń tilekterińizdi eskere otyryp, qoǵamdyq keńistikti abattandyrý jáne jasyldandyrý jónindegi sheshimderdi júzege asyrýǵa, bos ýaqytty densaýlyqqa paidaly ótkizýge bolatyn edi», — dedi qala ákimi Baqytjan Saǵyntaev.
Aitar bolsaq, byltyr aýdanda Altyn besik yqshamaýdanynda, Raiymbek, Sain, Abai dańǵyldarynyń, Altynsarin, Shaliapin, Tóle bi, Momyshuly, Iasaýi kósheleriniń boiyna 4 myńnan astam ártúrli aǵash otyrǵyzyldy.
