2020-2022 jyldarǵa arnalǵan biýdjet jobasynda bilim jáne ǵylym júiesin damytýǵa 2 trln teńge bólinedi.
Bul týraly Parlament Májilisinde «2020-2022 jyldarǵa arnalǵan respýblikalyq biýdjet týraly» zań jobasyn tanystyrý barysynda QR birinshi qarjy vitse-ministri Berik Sholpanqulov málim etti, dep habarlaidy QazAqparat.
«Bilim jáne ǵylym júiesin damytýǵa 2020-2022 jyldarǵa arnalǵan biýdjet jobasynda 2 trln teńge, onyń ishinde 2020 jylǵa 570,0 mlrd teńge kózdelgen. 2020 jyly bilim berý salasyndaǵy 230 mlrd teńge somasyndaǵy biýdjettiń negizgi shyǵystary ekonomika salalary úshin tehnikalyq jáne kásiptik, joǵary jáne joǵary oqý ornynan keiingi bilimi bar bilikti mamandardy daiarlaýǵa baǵyttalǵan», - dedi B. Sholpanqulov.
Tuńǵysh Prezidenttiń tapsyrmasyn iske asyrý maqsatynda «Pedagog mártebesi týraly» zań jobasy ázirlendi, ony iske asyrýǵa biýdjette 453,5 mlrd teńge, onyń ishinde 2020 jylǵa 94,6 mlrd teńge qarastyrylǵan.
«2020 jyldan bastap orta bilim berýdi jan basyna shaqqanda qarjylandyrýdy tolyq aýqymdy engizýdi júzege asyrý josparlanýda. Úsh jyldyq kezeńde ony iske asyrýǵa 224 mlrd teńge, onyń ishinde 2020 jylǵa 54,5 mlrd. teńge kózdelgen», - dedi birinshi vitse-ministr.
2022 jyldyń sońyna deiin jańa stýdenttik jataqhanalar qurylysyn qamtamasyz etý maqsatynda respýblikalyq biýdjet jobasynda úsh jyldyq kezeńge 75 myń oryndyq, onyń ishinde 2020 jyly 20 myń oryndyq jataqhanany iske qosý boiynsha shyǵystar josparlanyp otyr.
Prezident úsh aýysymdy oqytýdy sheshý jáne 2022 jyldyń sońyna deiin apatty mektepterdi joiý mindetin qoidy. Osy maqsattarǵa 286,8 mlrd teńge somasynda shyǵystar, onyń ishinde 2020 jyly 87,1 mlrd teńge jergilikti biýdjetter bazasyna berildi.
