QR Premer-Ministriniń birinshi orynbasary - Qarjy ministri Álihan Smaiylov biýdjet qarajatyn igere almaǵan ákimshilikterdi atady, dep habarlaidy QazAqparat tilshisi.
Onyń aitýynsha, respýblikalyq biýdjet shyǵystary 4 trln 894 mlrd teńgege igerildi.
«Ótken jyldyń 5 aiymen salystyrǵanda shyǵystardyń kólemi 1 trln 209 mlrd teńgege ósti. Atqarylmaǵan soma 59 mlrd teńgeni qurady. Onyń ishinde 10 mlrd teńge únemdelgen jáne 49 mlrd teńge igerilmegen. Eń kóp igerilmegen somalardyń Tsifrlyq damý, qorǵanys jáne aeroǵarysh ministrliginde (10 mlrd teńge), Ortalyq sailaý komissiiasynda (8 mlrd teńge), Qorǵanys ministrliginde (4,6 mlrd teńge), Qarjy ministrliginde (4,6 mlrd teńge) jáne Joǵarǵy sotta (4,3 mlrd teńge) ekeni anyqtaldy», - dedi Álihan Smaiylov Úkimet otyrysynda.
Igerilmeýdiń negizgi sebepteri retinde ministr memlekettik mekemelerdi qaita uiymdastyrý, konkýrstyq rásimderdi uzaq ótkizý, oryndalǵan jumystar aktilerin ýaqtyly usynbaý, qazynashylyq organdaryna tirkeýge sharttar men qosymsha kelisimderdiń kesh usynylǵanyn aitty.
«Respýblikalyq biýdjette óńirlerge 1 trln 638 mlrd teńge nysanaly transfertter qarastyrylǵan. Esepti kezeńde olarǵa 407 mlrd teńge bólindi. Onyń 97,9%-ti igerildi. Atqarylmaǵan 8,5 mlrd teńgeniń 1,5 mlrd teńgesi únemdeldi jáne 7 mlrd teńgesi igerilmedi. Neǵurlym kóp igerilmeý: Nur-Sultan qalasynda - 1 mlrd teńge, Jambyl oblysynda - 0,9 mlrd teńge, Batys Qazaqstan jáne Túrkistan oblysyntarynda - 0,7 mlrd teńgeden, Aqtóbe oblysynda - 0,6 mlrd teńge. Oǵan tólemniń negizdiligin rastaityn qujattardyń usynylmaýy, jumystardyń bekitilgen kesteden qalýy, konkýrstardyń ótkizilmeýi sebep bolǵan», - dedi Álihan Smaiylov.
