Ádilet vitse-ministri Almat Madaliev 2019 jyly sot-saraptama, sot aktilerin oryndaý jáne memlekettiń múliktik quqyqtaryn qorǵaý boiynsha jumys baǵyttaryn baiandady, dep habarlaidy QazAqparat.
«2019 jyly sot-saraptamaǵa 190 myńnan astam material kelip tústi. Oryndalǵan saraptamalardyń úlesi 96 paiyzdan asty. Osylaisha, ministrliktiń Strategiialyq josparynyń tiisti kórsetkishine qol jetkizildi. Bul rette, oryndalmai qaitarylǵan materialdar sany aitarlyqtai qysqardy (2019 jyly – 2 238, 2018 jyly – 3 014). Qaitalama saraptamalar sany 11 paiyzǵa azaidy (257-den 229-ǵa deiin, onyń 153-i rastalǵan, 30-y rastalǵan joq, 26-y ishinara rastalǵan)», - dep naqtylady vitse-ministr vedomstvonyń keńeitilgen alqa májilisinde.
Onyń sózine qaraǵanda, 2019 jyly aqyly qyzmetter boiynsha ósimge qol jetkizildi. Jyldyń korytyndysy boiynsha 386 mln teńge kóleminde aqyly qyzmetter kórsetildi.
Budan bólek ol halyqpen jumys kórsetkishterine toqtaldy.
«Eseptik kezeńde barlyǵy 383 ótinish kelip tústi. Bul ótken jylmen salystyrǵanda 25 paiyzǵa artyq (2018 j. - 306 ótinish). Alaida, aryzdardyń basym bóligi óziniń rastaýyn tappaǵanyn atap ótken jón. Tekserý barysynda tek 6 ótinish rastaldy. Qaraý nátijeleri boiynsha 16 qyzmetker tártiptik jaýapkershilikke tartyldy», - dedi A. Madaliev.
