BUU júiesinde Qazaqstannan 71 volonter qyzmet etedi, onyń ishinde 42 áiel bar. Bul týraly QR Aqparat jáne qoǵamdyq damý ministrligi Azamattyq qoǵam isteri komitetiniń tóraǵasy Madiiar Qojahmet aitty, dep habarlaidy QazAqparat.
«Halyqaralyq volonterlikti damytý jumystary da belsendi júrgizilýde. Búginde BUU júiesinde Qazaqstannan 71 volonter qyzmet etedi, onyń ishinde 42 áiel bar jáne QR Aqparat jáne qoǵamdyq damý ministrligi men BUUE arasyndaǵy áriptestik týraly kelisim sheńberinde 7 volonter BUU-nyń túrli agenttikterine jiberilgen», - dedi Madiiar Qojahmet Ortalyq kommýnikatsiialar qyzmetinde ótken baspasóz máslihatynda.
Spikerdiń aitýynsha, Qazaqstan men Reseidiń volonterlik uiymdary kóshbasshylarynyń qatysýymen volonterlik keńes jumys isteidi, búgin de osy keńestiń otyrysy ótedi.
«Ótken jyly Memleket basshysy Q.Toqaev BUU Bas Assambleiasynyń 75-shi sessiiasynda aldaǵy jyldardyń birin volonterlerdi jumyldyrýdyń halyqaralyq jyly dep jariialaý bastamasyn kóterdi. Búgingi tańda jaýapty ministrlikter men BUU ony ilgeriletý boiynsha jumys júrgizýde. Atap aitqanda, Damý maqsatynda eriktilerdi jumyldyrýdyń halyqaralyq jylyn jariialaý týraly BUU-nyń tiisti qararyn qabyldaý máselesi qarastyrylýda.
Sonymen qatar, Memleket basshysynyń tapsyrmasymen biyl aldaǵy orta merzimdi kezeńge arnalǵan jáne tujyrymdamalyq qadamdardy kózdeitin volonterlikti damytýdyń 2021 - 2023 jyldarǵa arnalǵan Jol kartasy ázirlendi. Qazir jobany QR Úkimetiniń qaýlysymen qabyldaý kútilýde», - deidi M. Qojahmet.
