Altynai Qaraǵoishieva Almatydaǵy perzenthanalardyń birinde akýsher-ginekolog bolyp jumys isteidi. Munda qazir koronavirýspen aýyratyn áielder ákelinedi. Ol árqashan óz jumysyna úlken jaýapkershilikpen qaraidy. Biraq búginde Altynai bosanǵan áielder men jańa týǵan sábiler úshin ǵana emes, sonymen qatar óz otbasyna da aýrý juqtyrmaýy úshin jaýapty, dep jazady BUU jańalyqtary.
Altynai Qaraǵoishieva Almaty qalasyndaǵy №1 qalalyq perzenthananyń bosandyrý bóliminde 15 jyldan beri akýsher-ginekolog bolyp jumys isteidi. Onyń aitýynsha, bul perzenthana COVID-19 juqtyrýy múmkin júkti áielderdi bosandyratyn oqshaýlaý orny retinde tańdalǵanda, ol bir sát te oilanbastan, óz qyzmetinde qalýǵa bel býǵan.
Qazaqstanda COVID-19 juqtyrýdyń alǵashqy jaǵdailary osy jyldyń naýryz aiynda Nur-Sultan men Almaty qalalarynda anyqtaldy. Indet anyqtalǵan alǵashqy kúnderi bilik DDU qoldaýymen meditsina qyzmetkerlerin pandemiia jaǵdaiynda jumys isteýge daiyndaýǵa arnalǵan oqý kýrstaryn uiymdastyrdy. Qalalyq densaýlyq saqtaý basqarmasynyń juqpaly aýrýlar jónindegi mamandary Altynai jumys isteitin perzenthana qyzmetkerlerin oqytty. Onda jańa infektsiiadan qorǵaný jáne COVID-19 indetine shaldyqqan adamdarǵa kómek kórsetý boiynsha oqydy.
«Kelesi kúni tańǵy altydan bastap bizge COVID-19 diagnozy rastalǵan adamdarmen tyǵyz bailanysta bolǵan áielder kelip túse bastady, – dep eske alady Altynai. – Eki kúnnen keiin bizge karantindegi júkti áielder kelip túse bastady, olardyń kópshiliginiń jańa koronavirýske tapsyrǵan testi oń nátije kórsetken. Bul kúni men tórt áieldi bosandyryp aldym: úsheýi tabiǵi jolmen, al bireýi kesar tiligi arqyly bosandy. Osy áielderdiń barlyǵy COVID-19 juqtyrǵan».
Altynaidyń aitýynsha, pandemiia bosanatyn áielderge kómek kórsetý protsesin qiyndatqan. Mysaly, búginde medbikeler sany qysqarǵandyqtan, bosanatyn áielderdi emotsionaldy túrde qoldaýǵa ýaqyt jetpeidi. Tolǵaq kezinde aýyrsynýdy sezinetin áielder ózderin jalǵyz sezinedi. Meditsina qyzmetkerleriniń ózderi de óziniń jáne balalarynyń densaýlyǵyna alańdaidy.
«Men perzenthanada aýrý juqtyrǵan patsienttermen jumys isteýden qoryqpaimyn, biraq óz otbasym men balalarym úshin ýaiymdaimyn. Bosanǵan ana men jańa týǵan sábidiń jaǵdailary jaqsy ekenin kórgende, óz ýaiymymdy jeńý ońai bolady», - deidi Altynai Qaraǵoishieva.
Oǵan táýligine 24 saǵattan qorǵanysh kostiýmimen jáne maskamen jumys isteýge týra keledi. Bul ońai emes.
«Keide únemi maska taǵý men respirator qoldanǵannan teri kógerip, qyzarady. Al keibir áriptesterimde ondai zattarǵa allergiia bar. Maskany únemi aýystyryp otyrý kerek, sebebi olar ylǵaldy bolady. Bul – búkil álemdegi meditsina qyzmetkerleri úshin qiyn ýaqyt. Sonymen qatar, biz bárine ortaq problemamen betpe-bet keldik», - deidi dáriger.
Altynaiǵa aýrýhanada jumys istegen unaidy.
«Men óte tózimdi adam ekenmin. Qiyndyqtardy jeńe otyryp, óz jumysymdy jalǵastyrǵym keledi. Bul ońai sharýa emes, biraq anasy balasyn qushaqtap, saǵan alǵysyn aitqanda, barlyq qiyndyq umytylady», - deidi Altynai.
