Biriken ulttar uiymynyń Qazaqstandaǵy turaqty úleistirýshisi Mikaela Friberg-Stori uiymnyń Aýǵanstanǵa járdem kórsetý jónindegi missiiasy (UNAMA) men AIR-da akkredittelgen BUU-nyń basqa da agenttikteriniń Almatyǵa kelýine bailanysty Qazaqstan Úkimetine alǵys aitty, - dep habarlaidy QazAqparat.
Uiym ókilderin Almatyda qarsy alý kezinde Mikaela Friberg-Stori kelgen toptyń quramynda kimder bar ekenin qysqasha baiandady.
«Búgin BUU-nyń Aýǵanstanǵa kómek kórsetý jónindegi missiiasynyń ókilderi Almatyǵa kelip jatyr. Biz Qazaqstan úkimetine kórsetken qoldaýy men áriptesterimizdi osynda qabyldaý múmkindigin usynǵany úshin rizamyz. Aýǵanstanda jumys isteý úshin búkil álemniń ár túkpirinen, Eýropadan, Soltústik Amerikadan jinalǵan BUU qyzmetkerleri osynda kelip otyr. Olar Aýǵanstanǵa kómek kórsetý jumystaryn ári qarai jalǵastyrady. Keibireýleri Aýǵanstanǵa osy jaqtan qoldaý kórsetý úshin Almatyda qalady, al basqalary odan ári ózderiniń turatyn elderine nemese BUU qurylymyndaǵy agenttikteriniń keńseleri ornalasqan elderge ushady», - dedi BUU ókili.
Sondai-aq, ol osyndai qubylmaly kezeńde jedel kómek usynǵan Qazaqstan tarapyna uiym ókilderiniń alǵysyn jetkizdi.
«Ózderińiz biletindei, Aýǵanstandaǵy jaǵdai qazir óte qubylmaly jáne turaqsyz. Ushaqqa jetý úshin biraz ýaqyt qajet boldy. Biz qazaqstandyq biliktiń kórsetken qoldaýy, sondai-aq áriptesterimizdi osynda qabyldaý máselesinde kórsetken kómegi úshin óte rizamyz», - dedi Mikaela Friberg-Stori.
