Glazgoda ótken BUU-nyń klimat máselesine arnalǵan konferentsiiasynda jańa ǵalamdyq kelisim qabyldandy. Qujattyń maqsaty – 2030 jylǵa qarai memleketterdi aýaǵa ziiandy qaldyqtardy meilinshe azyraq shyǵarýǵa mindetteý jáne indýstriiaǵa deiingi kezeńmen salystyrǵanda ǵalamdyq jylyný temperatýrasyn Tselsii boiynsha 1,5 gradýstan asyrmai ustap turý.
Aqparat quraldary qorytyndy kelisimniń áý basta josparlanǵan nusqaǵa qaraǵanda "jumsarǵanyna" nazar aýdardy. Mysaly, Úndistan qujattaǵy kómir paidalanýdy toqtatý týraly bólikke qarsy bolyp, túzetýdi suraǵan. Aqyry kómir paidalanýdy birtindep azaitý týraly sheshim qabyldanǵan.
BUU bas hatshysy Antoniý Gýterrish klimat jónindegi kelisimmen ǵana shektelip qalýǵa bolmaitynyn aityp, konferentsiianyń mindeti qatysýshy elderdiń múddesi men qaishylyqtaryn eskerýge múmkindik beretin ortaq mámile qabyldaý ekenin moiyndaǵan.
BUU-nyń klimat jónindegi konferentsiiasy Shotlandiiada 31 qazanda bastalǵan. Oǵan álemniń 200 elinen 30 myń adam qatysqan. Alǵashqy kúnderi sharaǵa AQSh prezidenti Djo Baiden, Frantsiia basshysy Emmanýel Makron, Ulybritaniia premer-ministri Boris Djonson jáne ózge el basshylary qatysqan.
Oǵan Resei prezidenti Vladimir Pýtin qatysqan joq. Baiden álem elderimen birge Resei de klimat máselesine kezigip otyr, biraq onymen kúreske qajetti dárejede úles qosyp otyrǵan joq dep Pýtinniń sammitke qatynasyn synady.
Glazgodaǵy sammit kezinde birneshe manifestatsiia ótti. Oǵan shved ekobelsendisi Greta Týnberg qatysty. Ol damyǵan elderdiń basshylaryn klimattyń ózgerýimen shyn nietpen kúrespei otyr dep aiyptady. Týnberg parnik gazyn azaitý boiynsha radikaldy sharalar qabyldaýǵa úndedi.
