20 tamyzda BUU Qaýipsizdik keńesiniń Taiaý shyǵystaǵy beibitshilik pen qaýipsizdik máseleleri boiynsha ótken jiynynda AQSh memlekettik hatshysy Maik Pompeo Irandy aiyptady. Ol Tegeran men onyń deldaldary Irak, Livan, Siriia jáne Iemende "gýmanitarlyq saldary aýyr" janjaldardy qozdyratyn "terror men tártipsizdikti" taratyp otyr, - dep málimdedi.
Eger BUU Iranǵa salynǵan qarý-jaraq embargosynyń kúshi 2020 jyly qazanda toqtatýǵa kelisetin bolsa, onda Tegerannyń qatysýymen turaqsyzdyqty shaiqaltatyn janjal oshaqtary jańadan paida bolady dep sanaidy Pompeo.
BUU qabyldaǵan sanktsiia boiynsha, Irandaǵy Islam revoliýtsiiasy saqshylary korpýsynyń "Ál-Qudys" elitalyq jasaǵanyń qolbasshysy Kasem Sýleimani men taǵy basqa irandyq 23 qairatkerdiń saparmen barýyna tyiym salynǵan.
"Qarý-jaraq embargosy men saparǵa tyiymdy jalǵastyrýdy qamtamasyz etýde BUU Qaýipsizdik keńesi mańyzdy rol atqarady dep sanaimyz" dedi AQSh-tyń Iran boiynsha arnaiy ókili Braian Hýk Niý-Iorkte jýrnalisterge.
AQSh prezidenti Donald Tramptyń sheshimi boiynsha, ótken jyly Vashington Irannyń iadrolyq baǵdarlamasy týraly halyqaralyq kelisimnen shyqqan soń AQSh pen Irannyń arasyndaǵy jaǵdai shielenisip ketken. 2015 jyly shildede Iran men alty memleket - AQSh, Germaniia, Qytai, Ulybritaniia, Resei jáne Frantsiia qol qoiǵan kelisim boiynsha, Iran ýrandy baiytý baǵdarlamasyn azaitýǵa, al halyqaralyq qaýymdastyq Tegeranǵa munai jáne qarjy salasynda salynǵan sanktsiialardy jumsartýǵa mindetteme alǵan bolatyn.
