BUU Damý baǵdarlamasy (BUDDB) Nur-Sultandaǵy ftiziopýlmonologiialyq ortalyqqa infektsiialanǵan qaldyqtardy zalalsyzdandyratyn avtoklav pen qaldyq jinaityn konteinerlerdi tabystady, dep habarlaidy "Ult aqparat".
Apparat qaýipti jáne asa qaýipti meditsinalyq qaldyqtardy zalalsyzdandyrady, olardy keiinnen poligonda joiýǵa bolady.
«Avtoklav tsikli 1 saǵat 5 minýtqa eseptelgen, táýlik boiy jumys istei alady. Iaǵni bir táýlikte 12-15 tsikl óndire alady. Qurylǵyny qoldaný óte ońai jáne basty artyqshylyǵy – sýdyń eki ese kontýrda óńdelýi. Kárizge quiylǵan sý tolyǵymen qaýipsiz bolady. Avtoklav kúnine 600 keli qoqys tastai alady. Qaldyqtar qaýpine qarai A, B jáne V sanattaryna bólinedi», - dedi qyzmet kórsetýshi kompaniianyń tehnikalyq direktory Pavel Iakovets.
BUUDB habarlaýynsha, avtoklavtyń quny shamamen 100 myń dollardy quraidy. Joba sheńberinde Qazaqstannyń barlyq óńirlerinde meditsinalyq qaldyqtardy tiimdi basqarý úshin tsifrlyq derekter bazasy ázirlenetin bolady. Bul bastama COVID-19 pandemiiasy kezinde ǵana emes, odan keiin de qajetti meditsinalyq qaldyqtardy basqarýdyń turaqty júiesi bolady.
«Qalalyq densaýlyq saqtaý júiesi men Ftiziopýlmonologiia ortalyǵyn osyndai zamanaýi meditsinalyq qaldyq óńdeý ortalyǵynyń ashylýymen quttyqtaǵym keledi. Bizdiń strategiialyq seriktesimiz – BUUDB-ǵa osyndai múmkindik bergenine alǵys aitamyn. Qazir búkil álemniń koronavirýstyq pandemiiamen kúresip jatqanyn bilesizder. Sonyń ishinde bizdiń elimizde de úlken jumys atqaryldy. Barlyq meditsinalyq uiymdar, onyń ishinde Ftiziopýlmonologiia ortalyǵy alǵashqy kúnnen-aq koronavirýstyq infektsiiamen kúresýge qatysty. Naýqastar jatqan meditsinalyq uiymdar myńdaǵan jeke qorǵanys quraldaryn, tonnalaǵan meditsinalyq materialdar men quraldardy qoldandy. Barlyq paidalanylǵan materialdar qaýipti bolyp sanalady. Endi meditsinalyq qaldyqtar osyndai zararsyzdandyrý jáne joiý ortalyqtary arqyly ótedi jáne sodan keiin ǵana órteýge nemese turmystyq qaldyq retinde jiberiledi», - dedi QR Densaýlyq saqtaý vitse-ministri Ajar Ǵiniiat.
QR Ekologiia, geologiia jáne tabiǵi resýrstar vitse-ministri Ahmetjan Pirimqulov meditsinalyq qaldyqtardyń jetkilikti mólsherde órtelmei, qorshaǵan ortaǵa ziian keltirip jatqanyn aitty.
«Meditsinalyq qaldyqtar joǵary temperatýrada órtelýi tiis, sonda qorshaǵan ortaǵa shyǵaryndylar az bólinedi. Aimaqtarda meditsinalyq qaldyqtardyń kádimgi peshterde nemese ormanda órteletinin kóremiz. Árbir derek boiynsha Ekologiia ministrligi shara qabyldaidy jáne tekserý júrgizedi. Al búgin kórip otyrǵan ádis – óte durys. Biz Densaýlyq saqtaý ministrligimen birlesip, bolashaqta iri aýrýhanalarda qaldyqtardy zararsyzdandyratyn, osylaisha qatty turmystyq qaldyqtar poligondarynda qorshaǵan orta men densaýlyq úshin qaýipsiz etetin avtoklavtardy qoiý bastamasyn kóteremiz. Eger meditsinalyq qaldyqtar ekologiialyq jáne sanitarlyq normalarǵa sáikes joiylsa, olar qorshaǵan ortaǵa ziian keltirmeidi», - dedi vitse-ministr.
Qazirgi ýaqytta BUUDB 80 mln AQSh dollarynan astam somaǵa jeke qorǵanys quraldary men meditsinalyq taýarlardy satyp alý úshin 88 elge qoldaý kórsetti. BUDDB men Aziia damý bankiniń jańa bastamasy aiasynda meditsina qyzmetkerlerine arnalǵan standarttar men nusqaýlyqtar ázirlenip, olar emdeý mekemelerinde meditsinalyq qaldyqtardy durys jinaý, suryptaý, kádege jaratý, tasymaldaý jáne monitoring júrgizý daǵdylaryn jaqsartady dep kútilýde.
Sondai-aq joba sheńberinde Qazaqstannyń barlyq óńirlerinde meditsinalyq qaldyqtardy tiimdi basqarý úshin tsifrlyq derekter bazasy ázirlenetin bolady. Bul bastama meditsinalyq qaldyqtardy basqarýdyń turaqty júiesiniń negizin qalaidy, jáne de COVID-19 pandemiiasy kezinde, sondai-aq pandemiia aiaqtalǵannan keiin de paidasyn tigizedi.
