Alepponyń shyǵys sektoryndaǵy soǵys qimyldary aiaqtaldy dep málimdedi BUU janyndaǵy Resei ókili Vitalii Chýrkin. Siriia úkimeti kóterilisshiler qolynda bolǵan sońǵy aimaqty baqylaýyna aldy dedi diplomat.
BBC habarlaǵandai, eger bul shyndyqqa sai keletin bolsa, Aleppodaǵy tórt jylǵa sozylǵan soǵys aiaǵyna kelip jetti degen sóz.
Ótken seisenbi kúni Chýrkin Bashar Asadtyń qarýly qarsylastarynyń Aleppony tastap shyǵý jóninde kelisimge kelgendigin málimdegen bolatyn. Oppozitsiia bul kelisimdi rastady. Aleppodan kelgen habar boiynsha, sońǵy saǵattarda qala bombalanbaǵan, atystar da bolmaǵan.
Bul aqparat BUU-nyń úkimet kúshteriniń adam óltirý faktisi jóninde habarmen qatar tústi. BUU-nyń adam quqyqtary jónindegi komiteti qalanyń tórt aýdanynda 82 beibit turǵynnyń qaza tapqany jóninde senimdi kózderden habar alǵanyn habarlady. Onda ólgender sany odan da kóp bolýy múmkin degen qaýipteri bary da aitylǵan.
Ult portaly
