Birikken Ulttar uiymynyń boljamyna sáikes, 2050 jylǵa qarai Qazaqstanda 10 turǵynnyń jeteýi qalada turady, dep habarlaidy QazAqparat.
Energyprom.kz málimetinshe, Qazaqstanda qurylys salasy halyq ósimi qarqynynan birneshe ese joǵary. Máselen, osy jyldyń 7 aiynyń qorytyndysynda elimizde 7,7 mln sharshy metr turǵyn úi paidalanýǵa berildi. Bul ótken jylǵy kórsetkishten 10,3 paiyzǵa kóp. Munyń ústine jalpy paidalanýǵa berilgen 4 baspananyń úsheýi, naqty aitqanda 5,7 mln sharshy metr turǵyn úi qalalarda salynǵan. Biyl elimizde 17 mln sharshy metr turǵyn úidi paidalanýǵa berý josparlanyp otyr. Atalǵan jospar oryndalsa, onda ol jańa rekordtyq kórsetkish bolmaq.
Al Qazaqstan halqynyń jyldyq ósimi nebári 1,3 paiyz shamasynda ǵana. 2021 jyldyń 1 shildesinde elimizde 19 mln adam tirkelgen. Qala halqy 2 paiyzǵa jýyq ósip, 11,3 mln adamǵa jetken. Bul elimizdegi jalpy halyq sanynyń 59,2 paiyzyn quraidy.
Elimizde turǵyn úi qurylysy salasyndaǵy qarqyndy ósimge memlekettik baǵdarlama aiasyndaǵy qoljetimdi ipotekalyq nesie sep bolyp otyr. Tek osy jyldyń 7 aiynda ǵana «Otbasy» banki 183,9 mlrd teńgege jańa baspana satyp alý úshin 14,4 myń nesie berdi. «Otbasy» bankiniń jáne ózge de damý institýttary men memlekettik baǵdarlamalardyń arqasynda elimizde ýrbanizatsiia qarqyn alyp kele jatyr. BUU Ekonomikalyq jáne áleýmettik máseleler departamentiniń boljamyna qaraǵanda, 2050 jylǵa qarai Qazaqstanda ýrbanizatsiia deńgeii 69,1 paiyzǵa jetedi. Iaǵni, elimizdiń 10 turǵynynyń 7-eýi qalada turatyn bolady.
Salystyrmaly túrde aitar bolsaq, álemde ortasha boljamdy kórsetkish – 68,4 paiyz. Bul rette Aziia úshin 66,2, Ortalyq Aziia úshin 60,5 paiyzdy quraidy. Tabys deńgeii joǵary elderge arnalǵan bul boljam 88,4, tabysy tómen elder úshin 50,2 paiyz shamasynda. Osy turǵydan alǵanda Qazaqstanǵa arnalǵan boljam omtimistik deýge bolady.
