Foto: senate.parlam.kz
Senat depýtaty Alisher Satvaldiev Memleket basshysynyń BUU missiialaryna qatysý úshin Qarýly Kúshterdiń bitimgerlik kontingentin jiberý týraly usynysyna qoldaý bildirdi, - dep habarlaidy Kazinform agenttigi.
«Memleket basshysynyń BUU missiialaryna qatysý úshin Qarýly Kúshterdiń bitimger kontingentin jiberý týraly usynysyn qoldaimyn. Bul qadam elimizdiń halyqaralyq mindettemelerin turaqty oryndai otyryp, BUU-nyń tolyqqandy múshesi retinde Qazaqstannydń álemdik arenadaǵy rólin arttyrýǵa yqpal etedi dep oilaimyn», - dedi A. Satvaldiev.
Senator elimiz álemdik qaýymdastyqtyń jaýapty múshesi retinde 2000 jyldan beri BUU aiasyndaǵy bitimgerlik operatsiialarǵa qatysyp, álemdegi qaqtyǵys aimaqtarynda qaýipsizdik pen turaqtylyqty qamtamasyz etýge úles qosyp kele jatqanyn atap ótti.
«Senattyń Halyqaralyq qatynastar, qorǵanys jáne qaýipsizdik komitetiniń músheleri byltyrǵy jeltoqsan aiynda Bitimgershilik operatsiialar ortalyǵynyń qyzmetimen tanysty. «Bitimger» oqý-jattyǵý ortalyǵyna barǵan kezde, ulttyq kontingentti BUU bitimgershilik missiialaryna qatysýǵa daiyndaý erekshelikterimen tanysyp, áskeri qyzmetkerlerdiń qarý-jaraqpen, áskeri tehnikamen jáne múlikpen jabdyqtalýyn qarap shyqtyq. Bul rette, bizdiń bitimgerler aldaǵy ýaqytta da Qazaqstan atynan óz mindetin abyroimen atqarýǵa daiyn ekenine senimdimin», - dedi Alisher Satyvaldiev.
Onyń aitýynsha, bizdiń kontingenttiń missiiaǵa qatysýy elimizdiń Qarýly Kúshterine zor tájiribe jinaqtaýǵa múmkindik beredi.
«Bizdiń bitimgerler qaqtyǵystardy toqtatýda jáne halyqaralyq qatynastarda jańa tájiribeni meńgerip qana qoimaidy, sonymen qatar basqa da elderdiń áskerleriniń jaýyngerlik is-qimyldarynyń erekshelikterimen jáne olardyń qarý-jaraqtarymen tanysady», - dedi depýtat.
