Mysyrda Sybailas jemqorlyqpen kúres jónindegi dúniejúzilik konferentsiia ótti, dep habarlaidy QazAqparat BUU-nyń jańalyqtar saityna silteme jasap.
Jiynda BUU-nyń Bas hatshysy Antoniý Gýterrish pen BUU-nyń Esirtki jáne qalmys jónindegi basqarmasynyń Atqarýshy direktory Geda Vali sybailas jemqorlyq álemniń barlyq elderinde bar ekennin aitty. Onyń saldarynan salyq tóleýshilerdiń qaltasynan shyqqan trilliondaǵan dollar aýrýhanalar men mektepterge jetpei, jemqorlardyń qaltasynda qalady.
«Sybailas jemqorlyq qoǵamda keń taralǵan bolsa, adamdardyń kóshbasshylar men mekemelerge degen seniminen aiyrady. Ol teńsizdikti ýshyqtyryp, arsyzdyqqa aparady, áielder men qyzdardyń jaǵdaiyn odan saiyn qiyndata túsedi. Ashkózdik barlyǵyna ziian keltiredi», - dedi BUU Basshysy beinejoldaýynda.
Antoniý Gýterrish sybailas jemqorlarmen birge kúresýge shaqyrdy.
«Úmitti qaita jaǵyp, institýttarǵa degen senimdi qalpyna keltireiik. Qaýipsiz jáne ádil bolashaq úshin áreket jasaityn ýaqyt keldi», - dedi ol.
Aita ketsek, 2003 jyly 31 qazanda BUU-nyń Bas Assambleiasy Sybailas jemqorlyqqa qarsy konventsiiany qabyldap, ol 2005 jyly 14 jeltoqsanda kúshine endi. BUU-nyń Sybailas jemqorlyqqa qarsy konventsiiasyna múshe elder konferentsiiasynyń toǵyzynshy sessiiasy 17 jeltoqsanǵa deiin sozylmaq. Konferentsiia aiasynda sybailas jemqorlyqtyń túrli aspektilerine arnalǵan 75 shara ótedi.
