Qasym-Jomart Toqaev BUU Bas hatshysynyń arnaýly ókili jáne Aýǵanstanǵa kómek kórsetý jónindegi BUU missiiasynyń basshysy Debora Laionsty qabyldady, - dep habarlaidy "Ult aqparat" Aqordaǵa silteme jasap.
Kezdesýde Aýǵanstandaǵy daǵdarysty turaqtandyrý, gýmanitarlyq kómek kórsetý jáne áleýmettik-ekonomikalyq jaǵdaidy qalpyna keltirý jónindegi halyqaralyq kúsh-jiger aiasynda Qazaqstan men BUU arasyndaǵy yntymaqtastyqty damytýdyń perspektivalary talqylandy.
Memleket basshysy Qazaqstannyń terrorizm men ekstremizmge qarsy kúres, Aýǵanstanǵa gýmanitarlyq kómek kórsetý, aýǵan stýdentteri úshin bilim berý baǵdarlamalaryn jalǵastyrý salalary boiynsha halyqaralyq qoǵamdastyqpen jan-jaqty yntymaqtastyqty jalǵastyrýǵa beiildi ekenin rastady.
Debora Laions Memleket basshysyna Eýropalyq Odaq pen Ortalyq Aziianyń Aýǵanstan jónindegi arnaýly ókilderiniń keshe Almatyda ótken ekinshi kezdesýiniń qorytyndysy, sondai-aq UNAMA keńsesiniń Aýǵanstandy qalpyna keltirý úshin qabyldaǵan sharalary jóninde málimet berdi.
BUU joǵary laýazymdy ókili osy Uiymnyń Aýǵanstandaǵy missiiasynyń qyzmetine qoldaý kórsetkeni úshin Qazaqstan Prezidentine alǵys aitty.
Qol jetkizilgen kelisimderge sáikes UNAMA-nyń ýaqytsha qashyqtaǵy keńsesi Almatyda ornalasatyn boldy. Jýyq arada Qazaqstandaǵy atalǵan missiianyń mártebesi týraly kelisimge qol qoiylady.
