BUU jeksenbi kúni óziniń 120 qyzmetkeri men úkimettik emes uiymdar ókilderin Aýǵanstannan Qazaqstanǵa evakýatsiialady. Bul týraly BUU bas hatshysynyń ókili Stefan Diýjarrik taratqan málimdemede aitylǵan, dep habarlaidy QazAqparat HAA TASS agenttigine silteme jasap.
«BUU 22 tamyz kúni Aýǵanstannyń astanasynan 120 adamdy Almatyǵa jetkizdi, bul sońǵy aptadaǵy osyndai ekinshi áýe reisi. Jolaýshylar qatarynda BUU qyzmetkerleri men Aýǵanstandaǵy BUU-nyń áriptesteri sanalatyn birneshe úkimettik emes uiym músheleri bar», - delingen habarlamada.
Ótken aptada BUU-nyń júzge jýyq qyzmetkeri Kabýldan Almatyǵa qashyqtan jumys isteýdi jalǵastyrý úshin jetkizildi. «Taliban» radikaldy qozǵalysynyń sheshýshi shabýylynyń aldynda Aýǵanstandaǵy BUU-nyń túrli missiiasynda jergilikti halyq arasynan 3 myń adam jáne 700-den astam sheteldik jumys istegen.
«Taliban» radikaldy qozǵalysynyń jaýyngerleri 15 tamyz kúni shaiqassyz Kabýlǵa kirip, birneshe saǵattyń ishinde aýǵan astanasynda tolyq biligin ornatty.
