QR Syrtqy ister ministrligi Aýǵanstanǵa kómek kórsetý úshin Almaty qalasynda halyqaralyq hab qurý múmkindigi týraly máselege túsinikteme berdi, dep habarlaidy QazAqparat.
«Aýǵanstanǵa kómek, eń aldymen azyq-túlik jetkizý úshin BUU-nyń halyqaralyq logistikalyq habi retinde Almatyny qoldaný ideiasy atalǵan eldegi gýmanitarlyq apattyń aldyn alýdaǵy álemdik qoǵamdastyqtyń kúsh-jigerine is júzinde járdem kórsetýge baǵyttalǵan. Qazaqstan bastamasy BUU-nyń resmi ókilderi tarapynan aldyn ala oń reaktsiia aldy. Egjei-tegjeiin talqylaý ony barlyq múddeli taraptarmen keliskennen keiin ǵana oryndy», - dep atap ótedi ministrlik BAQ ókilderiniń resmi saýalyna orai.
QR Syrtqy ister ministrliginiń atap ótýinshe, Aýǵanstanǵa járdem kórsetý jónindegi BUU missiiasynyń Qazaqstannyń ońtústik astanasynda ornalasýy atalǵan elge kómek kórsetý úshin Almaty qalasynda halyqaralyq hab qurý bastamasynyń júzege asyrylýyna mańyzdy dáleli bolyp otyr. Ol Aýǵanstanǵa halyqaralyq kómekti úilestirýshi ortalyqqa ainala alady. Sol arqyly Aýǵanstan ekonomikasy kúireýiniń aldyn alýǵa, bosqyndar leginiń artýyna jol bermeýge, ózge de gýmanitarlyq sipattaǵy saldardy boldyrmaýǵa sep bolady.
«Kólik logistikasy turǵysynan Almatynyń qolaily ornalasýy (Kabýldan ushaqpen 3 saǵattyq jer) jáne tranzit habyn uiymdastyrý úshin qajetti ifraqurylymynyń bolýyn da mańyzdy faktor sanaimyz. Sonymen qatar Qazaqstan aýyl sharýashylyǵy ónimderi, onyń ishinde astyq pen un syndy azyq-túlik kómegin jetkizýshi de bola alady. Tiisti ýaǵdalastyqqa qol jetkizilgen jaǵdaida Aýǵanstanǵa júk tasymaldaý úshin áýe kemeleriniń kirepuly máselesi BUU quziretinde qalady», - dedi vedomstvodan.
