Birikken Ulttar uiymynyń Bas Assambleiasynda Aral mańy aimaǵyn «ekologiialyq innovatsiialar men tehniologiialar aimaǵy» dep jariialaityn qarardy biraýyzdan maquldady. Bul týraly BUU jańalyqtar ortalyǵy habarlady.
Bul bastamany Ózbekstan kótergen, al qarardy 50-den astam memleket qoldaǵan, olardyń arasynda Ázerbaijan, Belarýs, Qazaqstan, Resei, Tájikstan jáne Túrikmenstan elderi bar.
Ótken jyldyń qyrkúiek aiynda BUU-da sóz sóilegen Ózbekstan Prezidenti Shavkat Mirziioev Aral teńiziniń qurǵap ketý saldarynan Aral mańy aimaǵy «ekologiialyq apat oshaǵyna» ainalǵanyn aitty. Ol bul problemany sonyń ishinde «2 million gektar aýmaqta jańa landshaft, orman silemderin jáne topyraq qabatyn qalyptastyrý jolymen» birlesip sheshýdi usyndy».
Aral kezinde kólemi jaǵynan tórtinshi orynd turǵan jabyq teńiz bolǵan, qazirgi kezde ol qurǵap ketip, shaǵyn sýqoimaǵa ainaldy. Kóptegen balyq tuqymdary, sondai-aq aimaqta mekendegen jabaiy janýarlar – Turan jolbarysy, gepard, aqqýlar, flamingo, aq tyrna joǵalyp ketken.
Araldyń jalańashtanǵan bóliginde aýmaǵy 5,5 mln gektardan astam tuz shóli paida boldy. Munda shań soǵyp, atmosferaǵa kóptegen myń shaqyrym jerge shań men ýly tuzdy taratyp, ósimdikterdi joiyp otyrady. Ekologiialyq apat milliondaǵan adamnyń ómiri men densaýlyǵyna áser etti: dárigerler kómekei jáne óńesh obyrynyń, sondai-aq respiratorlyq, kóz jáne ózge aýrýlardyń kóbeiýin atap ótýde. Aral teńizi burynǵy qalpyna kele almaidy, biraq jergilikti turǵyndarǵa qorǵanys jáne kómek qajet bolyp otyr.
Osy qabyldanǵan qararda Bas Assambleia Aral mańy aimaǵynda ekologiialyq, áleýmettik, ekonomikalyq jáne demografiialyq jaǵdaidy jaqsartýǵa baǵyttalǵan aimaqtyq is-sharalar men bastamalardy qoldaityny málimdelgen.
