Nur-Sultan qalasynyń №2 Esil aýdandyq sotynda burynǵy qarjy vitse-ministri Rýslan Eńsebaevqa qatysty úkim shyqty, dep habarlaidy "Ult aqparat".
Osy qylmystyq is boiynsha A.A.Eskendirov, J.Ý.Baibosynov pen D.E.Buharbai da sottaldy.
Sot materialdaryna sáikes, Eńsebaev Baibosynov pen Buharbaidan qarjy ministrliginiń tsifrlandyrý jobalaryn aqparattyq súiemeldeý boiynsha qyzmet kórsetýdi satyp alý konkýrsynda "Al-Farabi Partners" JShS-niń jeńip shyǵýy úshin 1,2 million teńge para alǵan.
Al aqparat jáne qoǵamdyq kelisim ministrliginiń aqparat komiteti tóraǵasynyń burynǵy orynbasary Eskendirov qosalqy merdigerlik jumysty oryndaý boiynsha "Astana qalasynyń telearnasy" JShS men "Al-Farabi Partners" JShS-niń arasynda kelisimshartty rásimdeý kezinde qajeti qujattarǵa qol qoiýdy jedeldetý men qamqorlyq jasaǵany úshin 2,3 million teńge para alǵany úshin aiyptaldy. Ol aqshany da Baibosynov pen Buharbai bergen.
"Sottalýshylar kinási kýálardyń aiǵaqtarymen jáne bank shottary kóshirmelerimen dáleldendi.
Eńsebaev pen Eskendirov para alǵany úshin kináli dep tanyldy (QK-tiń 366-babynyń 2-bóligi). Baibosynov pen Buharbai adamdar tobynyń aldyn ala sóz bailasýymen birneshe ret para bergeni úshin kináli dep tanyldy (QK-tiń 367-babynyń 3-bóliginiń 1),3) tar.)", - delingen habarlamada.
Jaza boiynsha sottyń sheshimi
Para bergendigi úshin Qylmystyq kodekstiń 366-babynyń 2-bóligi boiynsha 3 jyldan 7 jylǵa deiingi merzimge bas bostandyǵynan aiyrý jazasy qarastyrylǵan.
"Sot qylmystyq jazany aýyrlatatyn mán-jai retinde qabyldanǵan anttyń buzylýyn tanydy, sondyqtan Eńsebaev pen Eskendirovke 4 jylǵa bas bostandyǵynan aiyrý jazasyn taǵaiyndaýdy ádil dep sanady.
Zań boiynsha adamdar tobynyń aldyn ala sóz bailasýymen birneshe ret para berýi asa qatań jaza – 7-den 12 jylǵa deiin bas bostandyǵynan aiyrýdy qarastyrady.
Sot Baibosynovqa qatysty jazany jeńildetetin mán-jai retinde kámeletke tolmaǵan balalarynyń bolýyn tanydy. Buharbaiǵa qatysty jazany aýyrlatatyn mán-jailar anyqtalǵan joq.
Osyǵan bailanysty, Baibosynov pen Buharbaiǵa zańmen qarastyrylǵan jazanyń eń tómen merzimi – 7 jyl bas bostandyǵynan aiyrý taǵaiyndaldy.
Sottalýshylar úkimniń jariialanýynan keiin qamaýǵa alyndy" dedi elorda soty.
Barlyq sottalýshylar memlekettik qyzmette laýazym atqarý quqyǵynan ómir boiyna aiyryldy.
Úkim zańdy kúshine engen joq.
