Foto: facebook.com/Nýrjan Altaev
Astana qalasynyń qylmystyq ister jónindegi mamandandyrylǵan aýdanaralyq soty asa iri mólsherde para alý faktisi boiynsha eks-vitse-ministr Nurjan Áltaevqa qatysty úkim shyǵardy, dep habarlaidy "Ult aqparat" sottyń baspasóz qyzmetine silteme jasap.
Áltaevqa Qylmystyq kodekstiń 366-babynyń 4-bóliginde kózdelgen qylmys boiynsha aiyp taǵylǵan.
"Eks-vitse-ministr 2018 jyldyń aqpanynan 2020 jyldyń shildesine deiin «Atameken» UKP múddeleri úshin tiimdi resmi sheshim qabyldaýǵa yqpaldasyp, M.-dan deldal arqyly jalpy somasy 115 myń AQSh dollary jáne 8 million 150 myń teńge aqshany para retinde aldy.
Sottalýshynyń kinási kýágerlerdiń aiǵaqtarymen, uialy telefondaǵy hat-habarlarmen, jasyryn tergeý áreketteriniń jazbalarymen, saraptama aktilerimen, zattai dáleldemelermen jáne t.b. dáleldendi" - delingen habarlamada.
Baspasóz qyzmeti málimetinshe, sotta prokýror aiyptaýdy qoldap, 12 jyl merzimge bas bostandyǵynan aiyrý jazasyn taǵaiyndaýdy surady. Al sottalýshy aqtaýdy ótindi.
"Sot balalarynyń bolýyn qylmystyq jaýaptylyq pen jazany jeńildetetin mán-jai dep tanydy. Al qabyldaǵan antyn buzýy aýyrlatatyn mán-jai retinde tanyldy.
Sot úkimimen eks-vitse-ministr A. Qylmystyq kodekstiń 366-babynyń 4-bóliginde kózdelgen qylmystyq quqyq buzýshylyq jasaǵany úshin kináli dep tanylyp, ómir boiy memlekettik qyzmette qyzmet atqarý quqyǵynan aiyryla otyryp, 10 jyl merzimge bas bostandyǵynan aiyryldy" - delingen habarlamada.
Úkim zańdy kúshine engen joq.
