Býrabai demalys ornynda karantin ýaqytynda tiin jáne qustardyń sany kóbeigen. Bul týraly «Býrabai» memlekettik tabiǵi ulttyq parkiniń direktory Sergei Bykov málim etti, dep habarlaidy QazAqparat.
«Bizdiń azamattardyń ekologiialyq mádenieti ortashadan tómen. Bizge kelýshilerdiń arasynda demalystan soń qoqysty jinap, tazalap ketetinder bar, ókinishke qarai iship-jep, sol jerge tastap ketetinder de kezdesedi. Al kei adamdar qoqysty kóliktiń terezesinen laqtyra salady. Jáne bul problema tek qana kól jaǵalaýynda ǵana emes», - deidi S. Bykov.
Onyń aitýynsha, sońǵy 15-20 jyl kóleminde Býrabaida demalýshylardyń sany artqan.
«Munda demalýshylardyń sany ondaǵan, júzdegen esege deiin artty. Eger 1990 jyldary jylyna 10-20 myń demalýshy kelse, ótken aptanyń ózinde 50 myń adam demalysqa keldi. Árine, tabiǵat keshenine degen antropogendik qysym bar, degenmen bizde jaz mezgili 2-3 ai ǵana, qalǵan ýaqytta kóktem, kúz, qystyń kúnderi tabiǵat tirilip, qaita qalpyna keledi. Eger bizde jaz 5-6 aiǵa sozylsa, onda qorshaǵan ortanyń jaǵdaiy máz bolmas edi. Aitar bolsaq, karantin men tótenshe jaǵdai kezinde, iaǵni naýryz, sáýir, mamyr ailarynda Býrabaida tiinder kóbeiip, qustar erkin án saldy. Antropogendik qysym jan-janýarlardyń tirshiligine keri áserin tigizedi», - deidi ol.
Ulttyq park basshysynyń sózine sensek, ótken jyly park aýmaǵynan 2 myń tekshe metrge jýyq qoqys shyǵarylsa, al biyl mamyr aiynan beri ol kórsetkish 700 tekshe metrge jýyqtaǵan.
