Foto:borovoe.kz
Býrabaidy Qazaqstannyń Shveitsariiasy dep beker aitpasa kerek. Tumsa tabiǵaty men saf aýasy, orman-toǵaiy men sairaǵan qustary kez kelgen týristi ózine baýrap, ǵashyq eptei qoimaidy. ULT.KZ tilshisi 2024 jyly Býrabaiǵa qansha teńgege qalai barýǵa bolatynyn anyqtap kórdi.
Qalai baramyz?
Árine atalǵan kórikti mekenge elimizdiń kez kelgen óńirinen avtokólikpen, poiyzben, ushaqpen nemese avtobýspen barýǵa bolady. Biraq biz elimizdiń eń iri qalalarynyń biri, bas qalamyz Astanadan qalai barýǵa bolatynyn qarastyryp kóreiik.
Kólikpen: Aldymen Astanadan Shýchinsk baǵytynda A1 trassasymen 222 km júremiz, sodan keiin R223 trassasynan shyǵyp, Jumabaevqa qarai júrý qajet bolady. Jol barlyǵy 257 km alady.
Poiyzben: Astana temirjol stantsiiasynan "Býrabai kýrorty" stantsiiasyna poiyzdar júredi. Olarǵa biletterdi jelide tapsyrys berýge nemese tikelei vokzaldan satyp alýǵa bolady. Jol júrý quny vagon túrine jáne qosymsha qyzmetterge bailanysty 1000 teńgeden 5000 teńgege deiingi aralyqta. Ortasha alǵanda, jol júrý ýaqyty 2-den 4 saǵatqa deiin sozylady. Poiyzdardyń kestesin kassalarda naqtylaýǵa bolady. Temirjol vokzalynan sanatoriige nemese qonaq úige avtobýspen nemese marshrýttyq taksimen jetýge bolady. Keibir mekemeler qosymsha aqyǵa transfer usynady.
Astanadan Býrabaiǵa baratyn marshrýt
Avtobýspen: Astanadan Býrabaiǵa reistik avtobýstarmen jetýge de bolady. Olar kún saiyn qaladan Shýchinsk pen Kókshetaýǵa barady. Biletter baǵasyn kassalarda naqtylaý kerek, óitkeni týristik maýsymda olardyń quny ósýi múmkin. Jalpy bilet baǵasy 1500 teńgeden bastalady.
Ushaqpen: Býrabaiǵa tikelei reister joq. Kýrortqa eń jaqyn áýejai-Kókshetaý áýejaiy. Ol kýrorttan 80 km qashyqtyqta ornalasqan. Demalys ornyna avtobýspen, shaǵyn avtobýspen nemese taksimen barýǵa bolady. Áýe biletiniń baǵasy ushaq klasyna jáne reiske bailanysty.
Foto:the-steppe.com
Qaida demalamyz?
Býrabaida ártúrli biýdjetke túrli demalys oryndary bar. Onda qonaqúiler men demalys oryndarynan bólek sanatoriiler de kezdesedi. Sebebi Býrabai tamasha tabiǵatymen ǵana emes, mineraldy sýy men shipaly saz batpaǵymen de tanymal.
Booking.com platformasyndaǵy málimetter boiynsha Býrabaidaǵy eń qymbat qonaqúi Rixos Borovoe oteli. Onyń bir táýliktik quny bólmeniń klassyna jáne ýaqytyna qarai 100 myń teńgeden bastalady. Jańa jyl siiaqty merekeler kezderinde 1 million teńgeden de asyp ketedi.
Foto:rixos.com
Mamyr, maýsym ailaryna bir táýlikke 100 myń teńge shamasynda aqsha tóleitin qonaqúi izdegenderge Booking.com saity SULTAN PLAZA Borovoe, Wyndham Garden Burabay, Promenade Burabay halal-apartments, siiaqty qonaq úilerdi usynyp tur.
Al táýliktik quny 20 myń teńgeden 40 myń teńgege deiin dep kórsetilgen qonaq úiler Konfor Hotel Burabay, Koktem Burabay, Riverside Burabay Hotel, AL BARAKA syndy qonaq úiler eken.
Aita keteiik, Býrabaiǵa barý quny siiaqty demalys ornynda jatý baǵasy da ýaqyty men qyzmet kórsetý deńgeiine qarai óte qatty qubylady.
