Kollaj: Ult.kz
2016 jyly qoǵamda úlken rezonans týdyrǵan Mataevtar isine qatysty jańa derekter jariialandy. Belgili jýrnalist Áset Mataev Telegram paraqshasynda sol kezdegi tergeý jumystary men oǵan qysym kórsetken tulǵalar týraly egjei-tegjeili baiandady, dep habarlaidy Ult.kz.
Onyń jazýynsha, sol kezde Qarjy politsiiasy tóraǵasynyń orynbasary bolǵan Talǵat Tatýbaev Áset pen ákesi Seiitqazy Mataevtarǵa Qylmystyq kodekstiń 65-baby boiynsha kináni moiyndaýǵa kóndirmek bolǵan. Atalǵan bap isine ókiný arqyly qylmystyq jaýapkershilikten bosatýdy qarastyrady.
Jýrnalisttiń aitýynsha, birqatar sheneýnik pen media ókilderi – Joǵarǵy sottyń baspasóz qyzmetiniń burynǵy jetekshisi Bolat Qaliianbekov, «Qazaqtelekom» vitse-prezidenti Mahanbetajiev, sondai-aq burynǵy aqparat komitetiniń basshylary Bersebaev, Qazanǵap, Baibosyn jáne Arpabaev – kináni moiyndaýdan bas tartqan Mataevtarǵa qarsy kýálik bergen. Avtordyń aitýynsha, olar bul áreketke qysymnan keiin barǵan jáne kópshiligi N.Nyǵmatýlin, Q.Esekeev, B.Baibek syndy saiasi elita ókilderine jaqyn tulǵalar bolǵan.
Jýrnalistik málimdemede aty atalǵan tulǵalardyń keiingi taǵdyry da sóz boldy. Mysaly, Bolat Qaliianbekovtyń isi 2021 jyly toqtatylǵan, al Mahanbetajiev áli de «Qazaqtelekom» kompaniiasynda qyzmet etip júr. Basqalarynyń bir bóligi quqyq qorǵaý organdarynyń nazaryna ilingen nemese kópshiliktiń nazarynan tys qalǵan.
Osydan keiin jýrnalist Talǵat Tatýbaevpen áńgimesi týraly jazdy.
"Biz Tátýbaevpen alǵash ret Astanadaǵy áigili «Seifýllin 37» ǵimaratynda kezdestik. Ol kezde polkovnik edi, jyltyldaǵan, júzinen nári taimaǵan — sábi sekildi. Birneshe aidan keiin general, finpolitsiia basshysy bolyp shyǵa keldi. Sol kezde bizge zań men tártip jaily «áńgime» aita bastady.
Men oǵan logikalyq dálelder keltirip, tike qarap sóilegenimde, kóziniń oinaqtaǵanynan-aq onyń jai ǵana «shpananyń» ókili ekenin túsindim. Ol «zań tilimen» emes, «túsiniktermen» sóilesýge tyrysyp, ómirdi bylai túsindirdi: «Tapsyrys bar, sondyqtan báribir túrmege otyrǵyzamyz». Biraq áńgime deńgeiine tótep bere almai, únsiz qaldy", - dep jazdy Áset Mataev.
Jýrnalist osy áńgimeden keiin birqatar qazaqstandyq jáne sheteldik BAQ-qa suhbat berip, pikir bildirgen. Alaida Tatýbaev odan BAQ-ty shýlatpaýdy surap, isti jabamyn dep sóz bergen, biraq ýádesinde turmaǵan.
"Sol kezde taǵy bir talap bolǵan — Nursultan Ábishulynyń aldynda kópshilik aldynda keshirim suraý. Bul da, bálkim, QK, QPK jáne sol kezdegi zańdardyń jabyq bólimderinen alynǵan bolar...", - dep eske aldy Áset Mataev.
Avtor sol kezeńde BAQ-taǵy jariialanymdardyń artynda saiasi tapsyrys bolǵanyn, al keibir redaktorlardyń keiin keshirim suraǵanyn eske aldy.
Jýrnalist bul jazbasyn kek alý maqsatynda emes, ádildiktiń keide keshigip bolsa da, túbi jeńetinin, ár árekettiń saldary bolatynyn eske salý úshin jazǵan.
"Kekke senetin adam — Qudaiǵa senbeidi. Munyń bárin tergeýshiler, prokýrorlar men sýdialar óz bolashaǵy týraly oilansyn dep jazyp otyrmyn. Býmerang degen nárse bar. Ol keide qaityp oralady. Tatýbaevtyń otbasyna densaýlyq, jaqsy advokattar men shydam tileimin. Olar da bir kúni SIZO-daǵy jaqyndaryna sálemdeme berý úshin aiaz ben aptapta kezekte turý degenniń ne ekenin sezinsin. Lagerlerdegi uzaq kezdesý bólmeleri men basqa da «ǵajaiyptaryn» bilsin. Býmerang keide qaityp oralady…", - dep túiindedi Áset Mataev.
Eske salaiyq, búgin Talǵat Tatýbaevtyń ustalǵany belgili boldy.
