Foto: Beinejazbadan
Astanada mekteptiń tórtinshi qabatynan oqýshy sekirip ketti. Bala qazir aýrýhanada jatyr, jaǵdaiy aýyr. Jasóspirimniń mundai qadamǵa ne sebeppen barǵanyn politsiia anyqtap jatyr. Al týystarynyń óz boljamy bar. Olar balany basqa oqýshylar bopsalaǵan dep esepteidi, dep habarlaidy «Ult aqparat» KTK arnasyna silteme jasap.
8 synyp oqýshysy Bekbolat Sailaý keshe túste aýyr jaǵdaida aýrýhanaǵa jetkizilgen. Qoly, eki aiaǵy synǵan, beline zaqym kelgen. Dárigerler ota jasap, bala búgin ǵana esin jidy
"Oń aiaǵy, oń qolyna ota jasadyq. Búgin tańerteń jalpy palataǵa aýystyryldy", - deidi Arslan Dúisenbaev, №2 kópbeiindi balalar aýrýhanasynyń bólim meńgerýshisi.
Bala esin jiǵan soń ǵana mán jaidy ata-anasy búgin bilip otyr.
"Erdáýlet degen bala, Arýjan ekeýi "meni bospasalaǵan" dedi. "Ony ázirge aitpaimyn" dedi. Al Erdáýlet, Dimash, Ádilet degen synybyndaǵy bala meni dárethanada uryp, "qońyraý bolǵansha seni óltiremiz, politsiiaǵa beremiz, ázir kóresiń, sabaqtan shyqqanda óltiremiz" dep aitty deidi. Sodan ashýlanyp kettim de, qońyraý shalyndy, aǵylshyn pániniń muǵalimi kirdi, sabaq biteiin degenshe, terezege qarap otyrdym, sabaq bitkennen keiin "ólip alaiynshy, mynalar meni óltiredi, politsiiaǵa beretin boldy dep" sekirip kettim" dedi",-deidi oqýshynyń anasy Lázzat Rahmash.
Týystary bala býllingtiń qurbany boldy dep sanaidy. "Osy mektepke aýysqaly qysymnan kóz ashpai keledi, birneshe ret úige beti kógerip keldi" - deidi jaqyndary.
Mektep basshylyǵy da osy oqiǵadan keiin abdyrap otyr. Bekbolatty tynysh, sabyrly bala dep minezdeme bergen direktor "odan mundaidy kútpedik" deidi.
"Eshkim baiqamai qaldy. Balalar tapsyrma oryndap otyrǵan, muǵalim kitap qarap otyrǵan. Bári tez bolǵan. Muǵalim sanaýly sekýndta basymdy kótergende, balanyń terezede ilinip turyp, qulaǵanyn kórdim dep otyr",—deidi №72 mektep-litsei direktory Aiman Dúisenova.
Shoshynyp qalǵan oqýshylar men muǵalimmen psihologtar jumys istep jatyr. Al direktory bilim ordasynda "býlling bolǵan joq" dep azar da bezer. Mán-jaidy qazir politsiia anyqtap jatyr. Is ishki ister ministrliginiń baqylaýynda.
"Oqiǵany sotqa deiingi tergeý reestrine tirkedik. Tergeý bastaldy, sonyń nátijesi boiynsha qorytyndy shyǵara alamyz. Oqiǵanyń sebebin dál qazir naqty aita almaimyn",— deidi QR Ishki ister ministriniń birinshi orynbasary Marat Qojaev.
Bir ólimnen aman qalǵan oqýshy endi uzaq emdelýi kerek. Aq halattylar taiaý arada onyń ekinshi aiaǵyna ota jasaýdy josparlap otyr.
