sýret ashyq derekkózden alyndy
Reseidegi propagandashyl basylymdardyń biri «Komsomolskaia pravda» radiosynyń jýrnalisi Dmitrii Steshin Qazaqstanǵa qatysty, sonyń ishinde, Soltústik Qazaqstan týraly málimdeme jasady, dep habarlaidy Azattyq Ruhy.
Ol tikelei efirdegi suhbatta «Máskeý Qazaqstannyń soltústigin qaitaryp alýy tiis» degen maǵynadaǵy arandatýǵa jol bergen. Suhbattyń úzindisi «Seiatel vetra» telegram-arnasynda jariialanǵan.
«Qazaqstanda iri oblystardy orys tildi halyq mekendeidi. Sondyqtan bul jerlerge bizdiń tarihi quqyǵymyz bar. Ol qalalardy bizdiń ata-babalarymyz salǵan. 1991 jyly nege súiene otyryp sol qalalardy syilai saldyq?», - deidi jýrnalist.
Dmitrii Steshin «Qazaqstannyń soltústigindegi oblystar Reseige tiesili jáne Resei ony basyp alýǵa quqyly» degen pikirde.
Aita keteiik, Reseidiń keibir laýazymdy tulǵalary buǵan deiin de Qazaqstannyń aýmaqtyq tutastyǵyna qatysty pikirlerin ashyq aitqan. Mysaly, Resei Federatsiiasy Memlekettik Dýmasynyń Bilim jáne ǵylym jónindegi komitetiniń tóraǵasy Viacheslav Nikonov Birinshi arnada «Qazaqstannyń territoriiasy - Resei tarapynan úlken syilyq» degen edi. Osyǵan bailanysty Qazaqstan Respýblikasynyń Syrtqy ister ministrligine Resei Federatsiiasynyń Ýaqytsha senimdi ókili Aleksandr Komarov shaqyrylyp, QR SIM reseilik diplomatqa nota tapsyrǵan bolatyn.
Sonymen qatar burynǵy Senat depýtaty, Halyqaralyq qatynastar, qorǵanys jáne qaýipsizdik komitetiniń tóraǵasy Muhtar Qul-Muhammed reseilik depýtattyń aitqany qazaqstandyqtardyń ashý-yzasyn týdyrdy dep, elimizdiń aýmaqtyq tutastyǵyna qatysty osyndai aiyptaýlar men arandatýshylyq málimdemelerge jol berýge bolmaidy degen edi.
