Qytaidyń joǵary oqý ornynda oqityn qazaqstandyq stýdentter Temirlan Bisenov pen Jánibek Sovet sailaýda alǵash ret daýys berdi, dep habarlaidy QazAqparat.
Beijińdegi №257 sailaý ýchaskesinde birinshi bolyp daýys bergen Qazaqstan azamattarynyń biri Beijiń Til jáne mádeniet ýniversitetiniń stýdenti Temirlan Bisenov pen Beijiń ýniversitetiniń stýdenti Jánibek Sovet boldy.
«Shynymdy aitsam, sailaýǵa birinshi ret qatysqandyqtan óte qatty tolqyp turmyn. Men úshin bul jaýapty tańdaý, óitkeni ózimniń sailaý quqyǵymdy paidalandym», - dep pikirimen bólisti J.Sovet.
Daýys berýge alǵash ret qatysqan qazaqstandyq jastar kádesyilarǵa ie boldy.
Eske sala keteiik, búgin, 10 qańtar kúni Nur-Sultan ýaqyty boiynsha saǵat 05:00-de (jergilikti ýaqyt boiynsha saǵat 07:00-de) Qazaqstannyń Qytaidaǵy Elshiligi (ǵimaraty Beijińde) jáne Shanhai qalasyndaǵy QR Bas konsýldyǵy janyndaǵy sailaý ýchaskeleri óz jumysyn bastady.
Beijińde stýdentter, diplomattar, ulttyq kompaniialardyń ókilderi jáne olardyń otbasy músheleri daýys bere alady.
Shanhai qalasyndaǵy Bas konsýldyq janyndaǵy sailaý ýchaskesinde (№294) Qytaidyń Tsziansý, Tsziansi, Anhoi, Chjetszian, Fýtszian provintsiialarynda jáne Shanhai qalasynda turatyn Qazaqstan azamattary daýys bere alady.
Buǵan deiin habarlaǵanymyzdai, búgin Qazaqstanda QR Parlamentiniń Májilisine jáne máslihattarǵa depýtattardy sailaý ótip jatyr. Qazaqstandyqtar 5 partiianyń biri úshin daýys bere alady: «Aýyl» halyqtyq-demokratiialyq patriottyq partiiasy, «Nur Otan» partiiasy, «ADAL» saiasi partiiasy, «Aq jol» demokratiialyq partiiasy, Qazaqstannyń halyq partiiasy.
