Elimizdiń 730 eldi mekeninde ótken ákim sailaýy aýyl ekonomikasynyń bazasyn ózgertedi. Ulttyq qoǵamdyq senim músheleriniń kezdesýinde «Ekonomikalyq zertteýler institýty» óńirlik zertteýler ortalyǵynyń direktory Qaisar Nyǵmetov ákim sailaýynan osyndai impýls kútetinin aitty, dep habarlaidy QazAqparat.
«Sailaýǵa oń baǵa berýge bolady. Úmitkerlerdiń basym bóligi ózin-ózi usyndy. Resmi qorytyndysy aitylǵannan keiin tolyqqandy baǵa bere alamyz. Ákimderdiń tikelei sailaýyn engizý - óte progressivti reforma. Qazir biz jergilikti ózin-ózi basqarý tujyrymdamasy boiynsha jumys istep jatyrmyz, aýyldyq okrýg ákimderiniń ekonomikalyq derbestigin arttyrýǵa qatysty, qandai salyq túrleri olardyń quzyryna beriledi degen siiaqty máselelerdi pysyqtap jatyrmyz. Osynyń negizinde jańadan sailanǵan ákimderdiń jumysyna qajet aýyl ekonomikasynyń bazasy jasalady», - degen sarapshy úmitkerlerdiń genderlik jáne jas quramyna toqtaldy.
«Resmi qorytyndy shyqqanda birneshe saýalǵa jaýap alamyz. Jeńimpazdar arasynda jergilikti jastardyń úlesi qandai, jalpy ortasha jas qandai, olar osy aýyldyń týmasy ma, álde jastar rezervinen tústi me? Osynyń bárin bilý qyzyqty bolar edi. Muny ázirge sailaý komissiialarynyń qorytyndysynsyz anyqtai almaimyz. Adamdar sailaýǵa kelip, naqty adamdardyń arasynan úmitkerdi tikelei ózderi tańdaǵandyqtan, onyń keleshektegi jumysyna áser etemiz degen senimi bar. Qazir halyq óz keleshigne qatysty qandai da bir sheshim qabyldaý kezinde pikirleri eskerilgenin qalaidy. Sondyqtan tikelei sailaýdyń alǵashqy tolqyny oidaǵydai ótti deýge bolady. Al naqty nátijesin, aýyl ómirine qalai áser etkenin bir-eki jyldyń ainalasynda kóre alamyz», - deidi sarapshy.
