Qazaqstandaǵy adam quqyǵy jónindegi hartiianyń atqarýshy direktory Jemis Turmaǵambetova búgin QR Prezidenti qol qoiǵan «Qazaqstan Respýblikasynyń keibir zańnamalyq aktilerine ólim jazasyn joiý máselesi boiynsha ózgerister men tolyqtyrý engizý týraly» zańǵa qatysty pikir bildirdi, dep habarlaidy QazAqparat.
«Elimizde 2004 jyldan bastap ólim jazasyna moratoriia jariialanyp keledi. Iaǵni bizde ólim jazasy joq desek te bolady. Al búgin Prezident jańa zańǵa qol qoiyp, ony tolyqtai alyp tastady. Sheshimdi tolyq qoldaimyn, bul saiasi sheshim. Sebebi Qazaqstanda adamdy ólim jazasyna kesetindei asa aýyr qylmys bolmaidy. Buny asa aýyr qylmys týraly statistikanyń ózi aityp tur. Sondyqtan da ólim jazasyn qaldyrýdyń esh máni joq. Esesine ómir boiy bas bostandyǵynan aiyrý jazasy bar. Osynyń ózi jetkilikti. Jalpy ólim jazasyn alyp tastaý máselesin men sala mamany retinde sonaý 1995 jyldan bastap túrli alańdarda kóterip kelemin», - dedi Jemis Turmaǵambetova.
Onyń aitýynsha, búginde álemniń 100-ge jýyq memleketi ólim jazasyn alyp tastaǵan.
«Burynǵy keńes odaǵyna múshe elder ishinde Qazaqstan men Belarýsta ǵana ólim jazasy bar edi. Endi tek Belarýs memleketi qalyp otyr. Taǵy bir aityp ótetin jait, keibirleýler ólim jazasyn alyp tastaýǵa qarsy bolyp jatady. Osy tusta aitarym, qylmys úshin adamǵa ólim jazasyn belgileý nemese onyń kúshin joiý tek qana sottyń úkimi emes, bul memlekettiń saiasi sheshimi. Al el taǵdyryna qatysty saiasi sheshimdi Memleket basshysy qabyldaidy. Bizdiń burynǵy «Jeti jarǵyny» alaiyqshy, onda ólim jazasy degen joq. Qunyn óteý degen bar. Ol degenimiz malmen, zat nemese aqshalai qunyn óteý. Odan bólek, qazaqta adamdy keshire bilý degen jaqsy qasiet bar», - deidi ol.
