قازاقستانداعى ادام قۇقىعى جٶنٸندەگٸ حارتييانىڭ اتقارۋشى ديرەكتورى جەمٸس تۇرماعامبەتوۆا بٷگٸن قر پرەزيدەنتٸ قول قويعان «قازاقستان رەسپۋبليكاسىنىڭ كەيبٸر زاڭنامالىق اكتٸلەرٸنە ٶلٸم جازاسىن جويۋ مەسەلەسٸ بويىنشا ٶزگەرٸستەر مەن تولىقتىرۋ ەنگٸزۋ تۋرالى» زاڭعا قاتىستى پٸكٸر بٸلدٸردٸ, دەپ حابارلايدى قازاقپارات.
«ەلٸمٸزدە 2004 جىلدان باستاپ ٶلٸم جازاسىنا موراتورييا جارييالانىپ كەلەدٸ. ياعني بٸزدە ٶلٸم جازاسى جوق دەسەك تە بولادى. ال بٷگٸن پرەزيدەنت جاڭا زاڭعا قول قويىپ, ونى تولىقتاي الىپ تاستادى. شەشٸمدٸ تولىق قولدايمىن, بۇل ساياسي شەشٸم. سەبەبٸ قازاقستاندا ادامدى ٶلٸم جازاسىنا كەسەتٸندەي اسا اۋىر قىلمىس بولمايدى. بۇنى اسا اۋىر قىلمىس تۋرالى ستاتيستيكانىڭ ٶزٸ ايتىپ تۇر. سوندىقتان دا ٶلٸم جازاسىن قالدىرۋدىڭ ەش مەنٸ جوق. ەسەسٸنە ٶمٸر بويى باس بوستاندىعىنان ايىرۋ جازاسى بار. وسىنىڭ ٶزٸ جەتكٸلٸكتٸ. جالپى ٶلٸم جازاسىن الىپ تاستاۋ مەسەلەسٸن مەن سالا مامانى رەتٸندە سوناۋ 1995 جىلدان باستاپ تٷرلٸ الاڭداردا كٶتەرٸپ كەلەمٸن», - دەدٸ جەمٸس تۇرماعامبەتوۆا.
ونىڭ ايتۋىنشا, بٷگٸندە ەلەمنٸڭ 100-گە جۋىق مەملەكەتٸ ٶلٸم جازاسىن الىپ تاستاعان.
«بۇرىنعى كەڭەس وداعىنا مٷشە ەلدەر ٸشٸندە قازاقستان مەن بەلارۋستا عانا ٶلٸم جازاسى بار ەدٸ. ەندٸ تەك بەلارۋس مەملەكەتٸ قالىپ وتىر. تاعى بٸر ايتىپ ٶتەتٸن جايت, كەيبٸرلەۋلەر ٶلٸم جازاسىن الىپ تاستاۋعا قارسى بولىپ جاتادى. وسى تۇستا ايتارىم, قىلمىس ٷشٸن ادامعا ٶلٸم جازاسىن بەلگٸلەۋ نەمەسە ونىڭ كٷشٸن جويۋ تەك قانا سوتتىڭ ٷكٸمٸ ەمەس, بۇل مەملەكەتتٸڭ ساياسي شەشٸمٸ. ال ەل تاعدىرىنا قاتىستى ساياسي شەشٸمدٸ مەملەكەت باسشىسى قابىلدايدى. بٸزدٸڭ بۇرىنعى «جەتٸ جارعىنى» الايىقشى, وندا ٶلٸم جازاسى دەگەن جوق. قۇنىن ٶتەۋ دەگەن بار. ول دەگەنٸمٸز مالمەن, زات نەمەسە اقشالاي قۇنىن ٶتەۋ. ودان بٶلەك, قازاقتا ادامدى كەشٸرە بٸلۋ دەگەن جاقسى قاسيەت بار», - دەيدٸ ول.
