Memleket basshysy QHR Búkilqytailyq halyq ókilderi jiyny turaqty komitetiniń Tóraǵasy Li Chjanshýmen kezdesti, dep habarlaidy "Ult aqparat" Aqordaǵa silteme jasap.
Kezdesý barysynda Qazaqstan men Qytaidyń parlamentaralyq yntymaqtastyǵy jaiy talqylandy. Eki tarapta atalmysh qarym-qatynastyń jumysyn oń baǵalady.
Qasym-Jomart Toqaev Li Chjanshýdy QHR-dyń 70 jyldyq merekesimen quttyqtap, Qytaiǵa memlekettik sapary barysynda jasalǵan ózara tiimdi ýaǵdalastyqtar jóninde aitty.
– Keshegi kelissózder sátti ótti. Qytai - Qazaqstannyń úlken kórshisi. Sondyqtan biz eki el arasyndaǵy jan-jaqty yntymaqtastyǵymyzdy eskere otyryp, Tóraǵa Si Tszinpinmen Birlesken málimdemege qol qoidyq. Onda bizdiń áriptestigimiz strategiialyq jáne uzaq merzimdi mánge ie ekeni kórsetilgen. Bul saparymnyń qorytyndylaryna qanaǵattanýǵa barlyq negiz bar, – dedi Prezident.
Memleket basshysy eki eldiń parlamentaralyq qarym-qatynastaryn odan ári nyǵaitý perspektivalary týraly aita kelip, osy jyldyń qyrkúieginde Nur-Sultan qalasynda ótetin Eýraziia parlamentteri spikerleri IV keńesiniń mańyzdylyǵyn da atap ótti.
– Sizdiń Qazaqstanǵa úsh ret kelgenińizdi bilemin. Jaqyn arada siz Qazaqstanǵa qaita barasyz. Biraq bul saparyńyz Búkilqytailyq halyq ókilderi jiyny turaqty komitetiniń Tóraǵasy retinde bolatyndyqtan, onyń jóni de bólek bolmaq. Biz sizdiń saparyńyzdy zor yqylaspen kútemiz,– dedi Qasym-Jomart Toqaev.
Li Chjanshý Qasym-Jomart Toqaevtyń Qazaqstan-Qytai qarym-qatynastaryn damytýǵa qosqan eleýli úlesin atap ótip, onyń Si Tszinpinmen kelissózderiniń nátijeli ótkenine toqtaldy.
– Keshe Siz ben Tóraǵa Si Tszinpinniń arasynda senimdi ári jemisti kelissózder boldy. Keń aýqymdy máseleler boiynsha pikir almasýlar ótti. Sonyń nátijesinde Birlesken málimdemege qol qoiyldy. Onda eki kóshbasshy da taraptar strategiialyq áriptestikti damytady dep málimdedi. Osylaisha, sizdiń Qytaiǵa saparyńyz úlken jetistikpen aiaqtaldy. Al Qazaqstan-Qytai qarym-qatynasy jańa tarihi kezeńge ótti, – dedi Li Chjanshý.
